റാങ്ക്​ പട്ടികയിൽനിന്ന്​ പ്രിയ വർഗീസിനെ ഒഴിവാക്കണമെന്നാവശ്യപ്പെട്ട്​ രണ്ടാം റാങ്കുകാരൻ ഹൈകോടതിയിൽ

കൊച്ചി: കണ്ണൂർ സർവകലാശാല മലയാളം അസോ. പ്രഫസർ നിയമന റാങ്ക്​ പട്ടികയിൽനിന്ന്​ ഒന്നാം ​പേരുകാരി പ്രിയ വർഗീസിനെ ഒഴിവാക്കണമെന്നാവശ്യപ്പെട്ട്​ രണ്ടാം റാങ്കുകാരൻ ഹൈകോടതിയിൽ. റാങ്ക്​ പട്ടിക പുനഃക്രമീകരിക്കണമെന്നതടക്കം ആവശ്യപ്പെട്ട്​ ചങ്ങനാശ്ശേരി എസ്.ബി കോളജിലെ മലയാളം അധ്യാപകൻ ജോസഫ് സ്കറിയയാണ്​ കണ്ണൂർ സർവകലാശാല വി.സി, പ്രിയ വർഗീസ് തുടങ്ങിയവരെ എതിർകക്ഷികളാക്കി ഹരജി നൽകിയത്​. അസോ. പ്രഫസർ തസ്തികയിലേക്ക്​ അപേക്ഷിക്കാൻപോലുമുള്ള യോഗ്യത പ്രിയ വർഗീസിനില്ലെന്ന്​ ഹരജിയിൽ പറയുന്നു. പ്രിയക്ക് മിനിമം യോഗ്യതയായ എട്ടുവർഷത്തെ അധ്യാപന പരിചയമില്ല. 2018ലെ യു.ജി.സി വ്യവസ്ഥകളനുസരിച്ച്​ റിസർച് സ്കോർ, അംഗീകൃത പ്രസിദ്ധീകരണങ്ങൾ എന്നിവ പരിശോധിച്ചിട്ടില്ല. ഇതൊന്നും പരിഗണിക്കാതെയാണ്​ വി.സി അധ്യക്ഷനായ സെലക്ഷൻ കമ്മിറ്റി തന്നേക്കാൾ മാർക്ക് പ്രിയക്ക് നൽകിയത്​. മുഖ്യമന്ത്രിയുടെ പ്രൈവറ്റ് സെക്രട്ടറിയായ കെ.കെ. രാഗേഷിന്‍റെ ഭാര്യയാണ്​ പ്രിയ വർഗീസ്​. യോഗ്യതയി​ല്ലാതെ ഒന്നാം റാങ്ക്​ ലഭിച്ച സംഭവം വിവാദമായതോടെ ഗവർണർ ഇടപെട്ട് നിയമന നടപടികൾ മരവിപ്പിച്ചിരിക്കുകയാണെന്നും ഹരജിയിൽ പറയുന്നു.