ആശുപത്രി പരിസരത്ത് രണ്ടുപേർക്ക് നായുടെ കടിയേറ്റു

മട്ടാഞ്ചേരി: കരുവേലിപ്പടി മഹാരാജാസ് താലൂക്ക് ആശുപത്രി പരിസരത്ത് രണ്ടുപേർക്ക് തെരുവുനായ്ക്കളുടെ കടിയേറ്റു. ആശുപത്രിക്ക് മുന്നിലെ ബസ് സ്റ്റോപ്പിൽ നിന്നയാളെ കടിച്ച ശേഷം വളപ്പിലേക്ക് കയറിയ നായ്​ ശുചീകരണ ജോലികൾ ചെയ്തിരുന്ന ജീവനക്കാരിയെയും കടിച്ചു. ആശുപത്രി പരിസരത്ത് മാസങ്ങളായി തെരുവുനായ്​ ശല്യം രൂക്ഷമാണ്. രോഗികൾ കിടക്കുന്ന വാർഡുകളിൽ വരെ നായ്​ക്കൾ കയറാറുണ്ടെന്നാണ് ചികിത്സയിൽ കഴിയുന്നവർ പറയുന്നത്. ഒഴിഞ്ഞ പറമ്പിലും പാർക്ക് ചെയ്തിരിക്കുന്ന വാഹനങ്ങൾക്ക് അടിയിലും കിടക്കുന്ന നായ്ക്കൾ പെട്ടെന്നാണ് ആക്രമിക്കുന്നത്. ഏതാനും ദിവസങ്ങൾക്ക് മുമ്പ് നായ്ക്കളെ പിടികൂടി വന്ധ്യംകരണം നടത്തി വിട്ടതായി കൗൺസിലർ ബാസ്റ്റ്യൻ ബാബു പറഞ്ഞു.