രാസ ലഹരികൾ ​ കൊറിയർ വഴി കേരളത്തിലേക്ക്​

കൊച്ചി: കൊറിയർ, വിദേശ തപാൽ സംവിധാനങ്ങൾ വഴി സംസ്ഥാനത്ത്​ ലഹരിക്കടത്ത്​ വ്യാപകമാകുന്നു. കഴിഞ്ഞ മാസങ്ങളിൽ സംസ്ഥാനത്തിന്‍റെ വിവിധയിടങ്ങളിൽ ഇങ്ങനെ കടത്തിയ ലഹരി ഉൽപന്നങ്ങൾ പൊലീസും എക്​സൈസും പിടികൂടിയിരുന്നു. വ്യക്​തികളുടേയോ സ്ഥാപനങ്ങളുടെയോ ​വിലാസം ദുരുപയോഗം ചെയ്താണ്​ കടത്ത്​. ഇതിന്​ ഉപയോഗിക്കുന്ന നമ്പർ ലഹരിവാങ്ങുന്ന ആളുടെയോ ഇടനിലക്കാരന്‍റെതോ ആകും. സ്ഥാപനത്തിൽ വന്നോ വഴിയിൽ വെച്ചോ കൊറിയർ വാങ്ങുകയാണ്​ പതിവ്​. വീട്ടുവിലാസങ്ങളിൽ പാഴ്​സലുകൾ എത്തിക്കാത്ത സ്ഥാപനങ്ങൾ ഉണ്ട്​. ഇത്​ ലഹരി സംഘങ്ങൾക്ക്​ ദുരുപയോഗം ചെയ്യുകയാണ്​. കൊറിയർ വഴിയുള്ള ഇടപാടുകൾ നിരീക്ഷണത്തിലാണെന്ന്​ എക്​സൈസ്​ - പൊലീസ്​ സംഘം അറിയിച്ചു. സംശയം തോന്നുന്നവയെപ്പറ്റി വിവരം നൽകണമെന്ന്​ ആവശ്യപ്പെട്ടിട്ടുണ്ട്​. നെതർലൻഡിൽനിന്നാണ്​ വിദേശ തപാൽ വഴി എം.ഡി.എം.എ സംസ്ഥാനത്ത്​ വ്യാപകമായി എത്തുന്നത്​. അമേരിക്കയിൽനിന്നും ഖത്തറിൽനിന്നും ഇത്തരത്തിൽ എത്തിയ എം.ഡി.എം.എ പാഴ്​സലുകൾ പിടികൂടിയിരുന്നു. എന്നാൽ, വിദേശത്തുനിന്ന്​ വരുന്ന എം.ഡി.എം.എയെക്കാൾ മലയാളികൾ കൂടുതലും വാങ്ങുന്നത്​ ബംഗളൂരിൽ നിന്നാണെന്ന്​​ അന്വേഷണ ഉദ്യോഗസ്ഥർ പറയുന്നു.​ നൈജീരിയൻ മാഫിയയാണ്​ ബംഗളൂർ കേന്ദ്രീകരിച്ച്​ കേരളമടക്കമുള്ള സംസ്ഥാനങ്ങളിലേക്ക്​ എത്തിക്കുന്നത്​. ഇവർ വീര്യം കൂട്ടാൻ മറ്റ്​ മാരക ഉൽപന്നങ്ങളും ചേർക്കും. അതിനാൽ ആവശ്യക്കാർ ഏറെയുള്ളത്​ ബംഗളൂരു, ഗോവ, മുംബൈ, ഡൽഹി എന്നിവിടങ്ങളിൽ നിന്നുള്ളവക്കാണ്​. സൗന്ദര്യവർധക വസ്തുക്കള്‍, മരുന്നുകൾ, ഭക്ഷണപദാർഥങ്ങൾ, പുസ്തകങ്ങള്‍ എന്നീ പേരുകളിലയക്കുന്ന പാഴ്​സലുകളിലാണ് കടത്ത്​​. സോഷ്യൽ മീഡിയ ആപ്പുകളായ ഇൻസ്റ്റഗ്രാം, ടെലഗ്രാം, വാട്​സ്​ആപ്പ്​ എന്നിവക്ക്​​ പുറമെ ഡാർക്​വെബ്​ വഴിയും ലഹരി ഇത്തരക്കാർ വാങ്ങുന്നുണ്ട്​​. മുമ്പ്​ ട്രെയിൻ, കെ.എസ്​.ആർ.ടി.സി ബസുകൾ വഴിയായിരുന്നു കടത്ത്​. പരിശോധന വ്യാപകമായതും, പൊലീസ്​ നായെ ഉപയോഗിച്ചുള്ള പരിശോധനയിൽ ഇവ വേഗം കണ്ടുപിടിക്കുന്നതിനാലുമാണ്​ കൊറിയറിലേക്ക്​ തിരിഞ്ഞത്​. നഗരങ്ങൾ കേന്ദ്രീകരിച്ച്​ ​കൊറിയർ സ്ഥാപനങ്ങൾക്ക്​ നിരവധി കേന്ദ്രങ്ങൾ ഉള്ളതും അവിടെ സ്ഥിരം പരിശോധനക്ക്​ സംവിധാനം ഇല്ലാത്തതും ഇവർക്ക്​ സഹായമാവുകയാണ്​. ചില സ്ഥാപനങ്ങളിൽ ലഹരി ഉൽപന്നങ്ങളുടെ ഇടനിലക്കാർ ഡെലിവെറി ബോയ്​ ആയി സേവനം അനുഷ്ഠിക്കുന്നുണ്ട്​. അവർ വഴി സുരക്ഷിതമായി ലഹരി എത്തിക്കുന്നുണ്ട്​. അത്തരക്കാരായ ചിലരും ചില സ്ഥാപനങ്ങളും അന്വേഷണ സംഘത്തിന്‍റെ നിരീക്ഷണത്തിലാണ്​. അനസ്​ അസീൻ