സാമൂഹ്യവിരുദ്ധർ നഗരം കൈയടക്കിയിട്ടും പൊലീസിന്​ പ്രിയം ​ ഹെൽമറ്റ്​ വേട്ട

കൊച്ചി: ക്രിമിനലുകളും സാമൂഹ്യവിരുദ്ധരും നഗരം കൈയടക്കിയിട്ടും ഹെൽമറ്റ്​ വേട്ടയിൽ മാത്രമൊതുങ്ങിയിരിക്കുകയാണ്​ നഗരത്തിലെ പൊലീസിന്‍റെ പ്രവർത്തനമെന്ന്​ ആക്ഷേപം. പൊലീസ്​ സ്​റ്റേഷന്​ മീറ്റററുകൾക്കപ്പുറം സാമൂഹ്യവിരുദ്ധർ തമ്പടിച്ചിരിക്കുമ്പോഴും അവരെ കണ്ടെത്താനും നിരീക്ഷിക്കാനും പൊലീസിനാകുന്നില്ല. രാത്രി പട്രോളിങ്​ എന്നത് നഗരത്തിലെ പ്രധാന റോഡുകൾ കേന്ദ്രീകരിച്ച്​​ പേരിന്​ മാത്രമായുള്ള ഏർപ്പാടായി മാറി. കഴിഞ്ഞ ദിവസം രാത്രി മധ്യവയസ്കനെ കുത്തിക്കൊന്ന നോർത്ത്​ ​മേൽപാലത്തിനടിയിൽ ക്രിമിനൽ സംഘങ്ങൾ തമ്പടിക്കുന്ന പ്രദേശമാണെന്ന്​ ജനങ്ങൾ പറയുന്നു​. ലഹരി ഉൽപന്നങ്ങൾ പരസ്യമായി ഉപയോഗിക്കുന്നതും സംഘട്ടനങ്ങൾ ഉണ്ടാകുന്നതും പതിവാണ്​. ബുധനാഴ്ച രാത്രി ഒമ്പതോടെ കൊലപാതകം നടക്കുന്നതിന്​ മണിക്കൂറുകൾക്ക്​ മുമ്പ്​ പാലത്തിനടിയിൽ പൊലീസ്​ സംഘം ഹെൽമറ്റ്​- സീറ്റ്​ ബെൽറ്റു വേട്ടക്കിറങ്ങിയിരുന്നു. പാലത്തിന്​ അടിയിൽ അനധികൃതമായി പാർക്ക്​ ചെയ്തിരിക്കുന്നതും ഉപേക്ഷിച്ച നിലയിലുള്ള വാഹനങ്ങളും കെട്ടിടങ്ങൾക്ക്​ സമീപത്തെ ഒഴിഞ്ഞയിടങ്ങളും ​സാമൂഹ്യവിരുദ്ധരുടെ താവളമാണ്​. സി.സി.ടി.വികൾ പ്രദേശത്ത്​ സ്ഥാപിച്ചിട്ടുണ്ടെങ്കിലും മിക്കതും പ്രവർത്തിക്കുന്നില്ല. നഗരത്തിലെ മിക്ക ഓവർ ബ്രിഡ്​ജുകളുടെയും താഴെ രാത്രികാലങ്ങളിൽ ലഹരിവിൽപനക്കാരുടെയും സാമൂഹ്യവിരുദ്ധരുടെയും താവളമാണ്​. ഇവിടെയൊന്നും പൊലീസ്​ തിരിഞ്ഞ്​ നോക്കാത്തത്​ സമീപവാസികളുടെ സ്വൈര്യം കെടുത്തുകയാണ്​. നോർത്ത്​ റെയിൽ വേ സ്​റ്റേഷനിലേക്കുള്ള പ്രധാന വഴികളിൽ ഒന്നായ ​നോർത്ത്​ റെയിൽവെ​ മേൽപാലത്തിൽ പൊലീസിന്‍റെ ശ്രദ്ധ വേണമെന്നാണ്​ യാത്രക്കാർ ആവശ്യപ്പെടുന്നത്​. സാമൂഹ്യവിരുദ്ധരെ അമർച്ചചെയ്യണം - കെ.എച്ച്.ആർ.എ കൊച്ചി: ജനങ്ങൾക്കും വ്യാപാരികൾക്കും ഭീഷണിയായി വിലസുന്ന എറണാകുളം നോർത്ത് പ്രദേശത്തെ സാമൂഹ്യവിരുദ്ധരെ അമർച്ചചെയ്യാൻ പൊലീസ്​ കർശന നടപടികളെടുക്കണമെന്ന് കേരള ഹോട്ടൽ റസ്റ്റാറന്‍റ്​ അസോസിയേഷൻ. എറണാകുളം നോർത്ത് റെയിൽവേസ്റ്റേഷൻ പരിസരം സാമൂഹ്യവിരുദ്ധരുടെ താവളമായിരിക്കുകയാണ്. പ്രദേശത്തെ വ്യാപാരികൾക്കും, റെയിൽവേസ്റ്റേഷനിലേക്കെത്തുന്ന ആളുകൾക്കും ഇവർ ഭീഷണിയാണ്​. കഴിഞ്ഞ ദിവസം റെയിൽവേസ്റ്റേഷന്​ മുന്നിലെ ഹോട്ടലിൽ കാഷ്​ കൗണ്ടറിലിരുന്ന ഉടമയെ സാമൂഹ്യവിരുദ്ധർ വെട്ടിപ്പരിക്കേൽപ്പിച്ചിരുന്നു. അതിന്‍റെ പിറകെയാണ് ഇന്നലെ ഹോട്ടലിന്​ മുന്നിൽ ഒരാളെ കുത്തിക്കൊന്നത്. രാത്രി ഈ പരിസരം സാമൂഹ്യവിരുദ്ധരുടെ കയ്യിലാണ്. പരിസരത്തെ വഴിവിളക്കുകളും കത്തുന്നില്ല. പൊലീസ്​ പട്രോളിങ്​ കർശനമാക്കണമെന്നും, രാത്രി പൊലീസിന്‍റെ സ്​ഥിരം സാന്നിധ്യം വേണമെന്നും ജില്ല പ്രസിഡന്‍റ്​ ടി. ജെ. മനോഹരനും, ജില്ല സെക്രട്ടറി കെ.ടി. റഹീമും ആവശ്യപ്പെട്ടു.