തൊഴിലിടത്തെ അച്ചടക്കം ഉറപ്പാക്കാൻ ജീവനക്കാരെ സ്ഥലം മാറ്റാം -ഹൈകോടതി

കൊച്ചി: സുരക്ഷസേനാംഗമാണെങ്കിലും തൊഴിലിടത്തെ അച്ചടക്കം ഉറപ്പാക്കുന്നതിന്‍റെ ഭാഗമായി ജീവനക്കാരെ സ്ഥലം മാറ്റാമെന്ന് ഹൈകോടതി. നെടുമ്പാശ്ശേരിയിൽ ജോലി ചെയ്തുവരുന്നതിനിടെ നർസാപൂരിലേക്ക്​ സ്ഥലം മാറ്റിയത്​ ചോദ്യം ചെയ്ത്​ സി.ഐ.എസ്.എഫിൽ എ.എസ്.ഐയായ ദിവ്യമോൾ നൽകിയ അപ്പീൽ ഹരജിയിലാണ്​ ജസ്റ്റിസ്​ ജയശങ്കരൻ നമ്പ്യാർ, ജസ്റ്റിസ് സി.പി. മുഹമ്മദ് നിയാസ്​ എന്നിവരടങ്ങുന്ന ഡിവിഷൻ ബെഞ്ചിന്‍റെ ഉത്തരവ്​. സ്ഥലം മാറ്റം ശരി​വെച്ച സിംഗിൾ ബെഞ്ച്​ ഉത്തരവ്​ ചോദ്യം ചെയ്യുന്ന അപ്പീൽ ഡിവിഷൻ ബെഞ്ച്​ തള്ളി. തൊഴിലിടത്ത് മോശമായി പെരുമാറിയതിനുള്ള ശിക്ഷാ നടപടിയെന്ന പേരിലാണ്​​ സ്ഥലം മാറ്റമെന്നായിരുന്നു ഹരജിക്കാരിയുടെ വാദം. അതേസമയം, തന്‍റെ സേവന കാലയളവിനിടെ പലവട്ടം ഉയർന്ന ഉദ്യോഗസ്ഥരുടെ നിർദേശങ്ങൾ ഹരജിക്കാരി നിരന്തരം ലംഘിക്കുകയും അച്ചടക്കവിരുദ്ധമായി പ്രവർത്തിക്കുകയും ചെയ്തതായി കോടതി വിലയിരുത്തി. 13 വർഷമായി കൊച്ചിയിൽ തന്നെയാണ്​ ജോലി ചെയ്തുവരുന്നത്. സ്ഥലംമാറ്റ ഉത്തരവുകളെ പല കാരണങ്ങൾ ചൂണ്ടിക്കാട്ടി കോടതിയിൽ ചോദ്യം ചെയ്തു വരുകയായിരുന്നെന്നും കോടതി നിരീക്ഷിച്ചു. ഉചിത കാരണങ്ങളുണ്ടെങ്കിൽ ഏത്​ ഉദ്യോഗസ്ഥരെയും സ്ഥലം മാറ്റാൻ അധികാരമുണ്ടെന്നും അത് സേവനത്തിന്‍റെ ഭാഗമായി കണക്കാക്കണമെന്നുമുള്ള സി.ഐ.എസ്.എഫിന്‍റെ വാദവും കോടതി കണക്കിലെടുത്തു.