കിഫ്ബി ഏറ്റെടുത്ത റോഡുകളുടെ അറ്റകുറ്റപ്പണി നടത്താൻ മന്ത്രി ഇടപെടണം -എം.എൽ.എ

ആലുവ: നവീകരണ പ്രവർത്തനങ്ങൾ കിഫ്ബി ഏറ്റെടുത്ത ആലുവ നിയോജകമണ്ഡലത്തിലെ റോഡുകളുടെ അറ്റകുറ്റപ്പണി നടത്താൻ പൊതുമരാമത്ത് മന്ത്രി ഇടപെടണമെന്ന് അൻവർ സാദത്ത് എം.എൽ.എ ആവശ്യപ്പെട്ടു. ആലുവ-മൂന്നാർ, ആലുവ-പെരുമ്പാവൂർ, ദേശം- വല്ലംകടവ് റോഡുകളിൽ നിറയെ കുഴികൾ രൂപപ്പെട്ടിട്ട് കാലങ്ങളായി. ആലുവ-മൂന്നാർ റോഡിൽ കുട്ടമശ്ശേരി ഗവ. ഹയർ സെക്കൻഡറി സ്കൂളിന് സമീപവും മഹിളാലയം ന്യൂ ഇറാ ക്ലിനിക്കിന് സമീപവും ചൊവ്വര, ആനിക്കാട് കവല, ചാലയ്ക്കൽ, പെരിയാർ പോട്ടറിസ് കവല തുടങ്ങിയിടങ്ങളിലെല്ലാം വലിയ കുഴികളുണ്ട്. ഈ റോഡുകൾ കിഫ്ബിക്ക് കൈമാറിയതിനാൽ അറ്റകുറ്റപ്പണി നടത്താൻ പി.ഡബ്ല്യു.ഡി റോഡ്സ് വിഭാഗം തയാറാകുന്നില്ല. അടിയന്തരമായി കുഴികൾ അടച്ച് സഞ്ചാരയോഗ്യമാക്കണമെന്നാവശ്യപ്പെട്ട് എം.എൽ.എ മന്ത്രി പി.എ. മുഹമ്മദ് റിയാസിന് കത്തയച്ചിട്ടുമുണ്ട്.