ഭാര്യയെ വെട്ടിപ്പരിക്കേൽപിച്ച്​ വയോധികൻ ജീവനൊടുക്കി

വൈക്കം: ഭാര്യയെ വെട്ടിപ്പരിക്കേൽപിച്ചശേഷം വയോധികനായ ഭർത്താവ് വിഷം കഴിച്ച്​ മരിച്ചു. തലയാഴം തോട്ടകം വാക്കെത്തറ കമ്യൂണിറ്റി ഹാളിനുസമീപം പുത്തൻവീട്ടിൽ ദാമോദരനാണ്​ (64) മരിച്ചത്​. കഴുത്തിന് പിന്നിൽ ആഴത്തിൽ മുറിവേറ്റ ഭാര്യ സുശീലയെ (58) വണ്ടാനം മെഡിക്കൽ കോളജ് ആശുപത്രിയിൽ അടിയന്തര ശസ്ത്രക്രിയക്ക്​ വിധേയയാക്കി. ഇവർ അപകടനില തരണം ചെയ്തതായി പൊലീസ് പറഞ്ഞു. ബുധനാഴ്ച ഉച്ചക്ക്​ 2.30ഓടെയാണ്​ സംഭവം. രാവിലെ വൈക്കം മഹാദേവ ക്ഷേത്രത്തിൽ പോയ സുശീല ക്ഷേത്രത്തിലെ പ്രാതലൂട്ടിനുശേഷം ഉച്ചകഴിഞ്ഞാണ് വീട്ടിലേക്കുവന്നത്. പാടശേഖരത്തിന്​ നടുവിലാണ് ദാമോദരനും കുടുംബവും താമസിച്ചിരുന്നത്. ഭാര്യയും രണ്ട്​ മക്കളുമുള്ള ദാമോദരൻ അവരെ ഉപേക്ഷിച്ച്​ സുശീലക്കൊപ്പം താമസിക്കുകയായിരുന്നു. ഈ ബന്ധത്തിൽ ഇവർക്ക് ഒരു മകനുണ്ട്. ഏതാനും വർഷം മുമ്പ് വാഹനാപകടത്തിൽ പരിക്കേറ്റ മകൻ ഉണ്ണി മനോനില തെറ്റിയ നിലയിലാണ്. കുറച്ചുകാലമായി ദാമോദരൻ വീട്ടിൽനിന്ന്​ കുറച്ചുമാറി ആടുകളെ വളർത്തുന്ന ഷെഡിന്‍റെ ഒരു ഭാഗത്താണ് കഴിയുന്നത്​. ബു​ധനാഴ്ച ഉച്ചകഴിഞ്ഞ് ഈ ഷെഡിനടുത്ത് എത്തിയ സുശീലയുമായി ദാമോദരൻ തർക്കമായി. ഇതിനിടയിൽ സുശീലയെ വീഴ്ത്തിയശേഷം കറിക്കത്തികൊണ്ട് കഴുത്തിന്‍റെ പിൻഭാഗത്ത് മുറിവേൽപിച്ചു. സുശീലയുടെ നിലവിളി കേട്ട് സമീപവാസികൾ ഓടിയെത്തി തടയാൻ ശ്രമിച്ചതിനെത്തുടർന്ന് ദാമോദരൻ പാടത്തുകൂടി ഓടിമറഞ്ഞു. പിന്നീട് പൊലീസ് നടത്തിയ തിരച്ചിലിൽ വിഷം കഴിച്ച്​ അബോധാവസ്ഥയിൽ കണ്ടെത്തി. ഉടൻ വൈക്കം താലൂക്ക് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മൃതദേഹം താലൂക്ക് ആശുപത്രി മോർച്ചറിയിൽ. വൈക്കം പൊലീസ് നടപടി സ്വീകരിച്ചു. ------ പടം: KTD Damodharan ദാമോദരൻ