നിറഞ്ഞൊഴുകി തുമ്പിച്ചാൽ; കാണികളുടെ തിരക്ക്​

കീഴ്​മാട്: മഴ ശക്തമായതോടെ വെള്ളം നിറഞ്ഞൊഴുകി തുമ്പിച്ചാൽ. കീഴ്​മാട് പഞ്ചായത്തിലെ തുമ്പിച്ചാൽ തടാകം കാണാൻ പ്രഭാതങ്ങളിലും സായാഹ്നങ്ങളിലും നിരവധിപേർ എത്താറുണ്ട്. എന്നാൽ, രണ്ട് ദിവസമായി തുടരുന്ന കനത്ത മഴയിൽ ജലസംഭരണി നിറഞ്ഞ് കവിയുകയായിരുന്നു. കുട്ടശ്ശേരി - മനക്കകാട് റോഡിന് കുറുകെ ഒഴുകുന്ന തുമ്പിച്ചാൽ തടാകം കാണാൻ വൻ ജനക്കൂട്ടമാണ് എത്തിയത്. പത്ത് ഏക്കറുള്ള തുമ്പിച്ചാലിന് എതിർവശത്തെ തുമ്പിച്ചാൽ പാടവും മഴക്കാലത്ത്​ മുങ്ങും. തുമ്പിച്ചാൽ തടാകത്തിനും പാടശേഖരത്തിനും നടുവിലൂടെയാണ് കുട്ടമശ്ശേരി - മനക്കകാട് - തടിയിട്ടപറമ്പ് റോഡ് പോകുന്നത്. റോഡ് കവിഞ്ഞ് വെള്ളം ഒഴുകുമ്പോൾ റോഡിന്‍റെ രണ്ട് വശത്തുനിന്നും വെള്ളം ഒഴുകി വരുന്ന ഭാഗത്താണ് ആളുകൾ വന്ന് നിൽക്കുന്നതും വെള്ളത്തിൽ ഇറങ്ങുന്നതും.