പൂത്തോട്ടയിൽ ചത്ത നായ്ക്കൾക്ക് പേവിഷബാധ സ്ഥിരീകരിച്ചു

*നാട്ടുകാർ ആശങ്കയിൽ തൃപ്പൂണിത്തുറ: പൂത്തോട്ടയിൽ ചത്ത നായ്ക്കൾക്ക് പേവിഷബാധ സ്ഥിരീകരിച്ചതോടെ നാട്ടുകാർ ആശങ്കയിൽ. പുത്തൻകാവ് പൂത്തോട്ട എട്ട്​, ഒമ്പത്​ വാർഡുകളിൽ നാട്ടുകാരിൽ ചിലരെ കടിച്ച നായ്​ക്കൾക്കാണ് കഴിഞ്ഞ ദിവസം വന്ന ലാബ് റിപ്പോർട്ടിൽ പേവിഷ ബാധ സ്ഥിരീകരിച്ചത്. കഴിഞ്ഞ വെള്ളിയാഴ്ച വാർഡ് ഒമ്പതിൽ ചത്ത നായുടെ മൃതദേഹം പോസ്റ്റ്​മോർട്ടം ചെയ്തപ്പോൾ ലാബ് റിപ്പോർട്ട്‌ പോസിറ്റിവ് ആയിരുന്നു. തിങ്കളാഴ്ച മുതൽ പലരെയും ഓടിനടന്ന് കടിക്കുകയും വിദ്യാർഥികൾ ഉൾപ്പെടെ വഴിയാത്രക്കാരെ ഭീതിയിലാക്കുകയും ചെയ്ത മറ്റൊരു നായ്​ ചൊവ്വാഴ്ച പുത്തൻകാവിലെ വാർഡ് എട്ടിൽ ചത്തിരുന്നു. പോസ്റ്റ്​മോർട്ടത്തിനായി മണ്ണുത്തിയിലേക്ക് അയച്ച ഈ നായും പേവിഷബാധ മൂലമാണ് ചത്തതെന്നാണ് റിപ്പോർട്ടിൽ പറയുന്നത്. വളർത്തുമൃഗങ്ങളുമായി ഇടപെടുന്നവരും കാൽനടക്കാരും പ്രത്യേകം ജാഗ്രത പുലർത്തണമെന്ന് ഉദയംപേരൂർ പഞ്ചായത്ത് എട്ടാം വാർഡ് അംഗം എം.പി. ഷൈമോൻ അഭ്യർഥിച്ചു.