കുന്നത്തുനാട് പഞ്ചായത്തിന്റെ വാർഷിക പദ്ധതിക്ക് അനുമതി നിഷേധിച്ചതായി പരാതി

പള്ളിക്കര: അഴിമതിക്ക് കൂട്ടുനിൽക്കാത്തതിനാൽ ജില്ല ആസൂത്രണ സമിതി കുന്നത്തുനാട് ഗ്രാമപഞ്ചായത്തിന്റെ 2022-23 വാർഷിക പദ്ധതിക്ക് അനുമതി നിഷേധിച്ചതായി പഞ്ചായത്ത് പ്രസിഡന്‍റ്​ എൻ.വി. നിതാമോൾ ആരോപിച്ചു. കുന്നത്തുനാട് ഗ്രാമപഞ്ചായത്തിൽ 16ാം വാർഡിൽ 2021-22 സാമ്പത്തിക വർഷം ജില്ല പഞ്ചായത്ത് എസ്.എൻ ജങ്ഷൻ ആനിയങ്കര റോഡ് മെയിന്റനൻസ് പ്രവൃത്തി ഏറ്റെടുത്തിരുന്നു. എന്നാൽ, കുന്നത്തുനാട് ഗ്രാമപഞ്ചായത്ത് 2018-19 സാമ്പത്തിക വർഷം ഈ പ്രവൃത്തി പൂർത്തീകരിച്ചിരുന്നു. നിലവിൽ അപാകതയൊന്നും ഇല്ലാത്ത റോഡിന്റെ ടാറിങ് പൊളിച്ചുമാറ്റി പഞ്ചായത്തിന്റെ അനുമതി കൂടാതെ വൻതോതിൽ മണ്ണെടുത്ത് സ്വകാര്യ പറമ്പുകളിലും പാടശേഖരങ്ങളിലും നിക്ഷേപിച്ചെന്നാണ്​ ആക്ഷേപം. ഇത് സംബന്ധിച്ച് പഞ്ചായത്തിൽ പരാതി ലഭിച്ചതിനെ തുടർന്ന് പ്രവൃത്തി നിർത്തിവെക്കാൻ ജില്ല പഞ്ചായത്തിന് നിർദേശം നൽകിയിരുന്നു. അന്വേഷണം നടത്തുന്നതിന് പഞ്ചായത്ത് വിജിലൻസ് ആൻഡ്​ ആന്റി കറപ്ഷൻ ബ്യൂറോ ഡയറക്ടർക്ക് പരാതിയും നൽകി. റോഡിന്റെ തുടർപ്രവർത്തനങ്ങൾക്ക് പഞ്ചായത്ത് എൻ.ഒ.സി നൽകാത്തതിനാൽ കുന്നത്തുനാട് പഞ്ചായത്തിന്റെ 2022-23 വാർഷിക പദ്ധതി അംഗീകരിക്കില്ലെന്നാണ്​ ജില്ല പഞ്ചായത്ത് പ്രസിഡന്റ് അറിയിച്ചതെന്ന്​ പഞ്ചായത്ത് പ്രസിഡന്‍റ്​ പറയുന്നു. അവഗണനക്കെതിരെ ജില്ല ആസൂത്രണ സമിതി മെംബർ സെക്രട്ടറി കൂടിയായ കലക്ടർക്ക് പരാതി കൊടുക്കുമെന്നും അവർ പറഞ്ഞു.