രാജ്യസ്‌നേഹം പരസ്യ കാമ്പയിനാകരുത്​ -തുഷാർഗാന്ധി

കൊച്ചി: ദേശീയപതാക സമൂഹമാധ്യമത്തിൽ പ്രൊഫൈൽ ചിത്രമാക്കുന്നതാണ്‌ രാജ്യസ്‌നേഹമെന്ന ചിന്ത പരിഹാസ്യമാണെന്ന്​ മഹാത്മാഗാന്ധിയുടെ ചെറുമകൻ തുഷാർ ഗാന്ധി. രാജ്യസ്‌നേഹമെന്നത്‌ പരസ്യകാമ്പയിനാക്കാനുള്ള സൂത്രവിദ്യയല്ല. രാജ്യത്തെ എല്ലാ ജനങ്ങളെയും സ്‌നേഹിക്കുമ്പോഴാണ്​ ദേശസ്നേഹിയാകുന്നത്​. അതു തെളിയിക്കേണ്ടത് ദൈനംദിന ജീവിതത്തിലൂടെയാണ്​. രവീന്ദ്രനാഥ ടാഗോറിന്റെ കേരള സന്ദർശനത്തിന്റെ നൂറാം വാർഷികത്തിന്റെയും മഹാത്മാഗാന്ധിയുടെ സന്ദർശനത്തിന്റെ 95-ാം വാർഷികത്തിന്റെയും ഭാഗമായി മഹാരാജാസ്‌ കോളജിലെ ചരിത്രവിഭാഗവും ആർക്കിയോളജി ആൻഡ്​ മെറ്റീരിയൽ കൾചർ സ്‌റ്റഡീസും ചേർന്ന്‌ സംഘടിപ്പിച്ച സെമിനാർ ഉദ്​ഘാടനം ചെയ്യുകയായിരുന്നു അദ്ദേഹം. ഇന്ന്​ രാജ്യസ്‌നേഹമെന്നത്​​ മതാധിഷ്ഠിതമാകുന്നുണ്ട്‌. രാജ്യസ്‌നേഹത്തെ രാഷ്ട്രീയവത്കരിക്കാനും ആചാരവത്കരിക്കാനുമാണ് ചിലർ ശ്രമിക്കുന്നത്. വീട്ടിൽ ദേശീയപതാക പാറിച്ച്​ സമൂഹമാധ്യമ പ്രൊഫൈൽ ത്രിവർണമാക്കാത്തവർ ദേശദ്രോഹികളാണെന്ന്​ വരുത്തിതീർക്കാനുള്ള ശ്രമമാണ്​ നടക്കുന്നത്​. സ്വാതന്ത്ര്യം ലഭിച്ചപ്പോൾ ദേശീയപതാക പറത്താതിരുന്നവർ ഇന്ന്​ അതിനെ കുറിച്ച്​ പറയുന്നതിൽ വൈരുധ്യമുണ്ട്. ദേശീയപതാക എന്നത്​ ഒരു വികാരമാണ്. സ്വാതന്ത്ര്യം ലഭിച്ച്​ 75 വർഷം പിന്നിട്ടിട്ടും പട്ടിണിയിൽനിന്നും ദാരിദ്ര്യത്തിൽനിന്നും നിരക്ഷരതയിൽനിന്നും രാജ്യത്തിന്​ മോചനം നേടാനായിട്ടില്ല. സ്വാതന്ത്ര്യാനന്തര ഇന്ത്യയിലെ തലമുറകൾ രാജ്യത്തോടുള്ള ഉത്തരവാദിത്തം മറക്കുന്നു. അതേസമയം പുതിയ തലമുറയിൽ തനിക്ക് പ്രതീക്ഷയുണ്ടെന്നും വിദ്വേഷം വളർത്തുന്ന വിഷശക്തികളിൽനിന്നും ജാതി- മത- ലിംഗ- വിവേചനങ്ങളിൽനിന്നും രാജ്യത്തെ മോചിപ്പിക്കാൻ അവർക്ക്​ സാധിക്കുമെന്നും അദ്ദേഹം പ്രത്യാശ പ്രകടിപ്പിച്ചു. കോളജ് പ്രിൻസിപ്പൽ ഡോ. വി.പി. ജോയ് അധ്യക്ഷത വഹിച്ചു. വൈസ് പ്രിൻസിപ്പൽ ഡോ. വിനോദ് കുമാർ കല്ലോലിക്കൽ, ഡോ. കെ.എസ്‌. ഷീബ, ഡോ. സിബി ജോസഫ്‌ തുടങ്ങിയവർ സംസാരിച്ചു. (ഫോട്ടോ)