​ട്രാഫിക് ജോലിക്കിടെ​ മൊബൈൽ ഫോൺ ഉപയോഗിക്കുന്ന പൊലീസുകാർക്കെതിരെ നടപടി വേണം -ഹൈകോടതി

കൊച്ചി: ട്രാഫിക് ജോലിക്കിടെ മൊബൈൽ ഫോൺ ഉപയോഗിക്കുന്ന പൊലീസുകാർക്കെതിരെ നടപടിയെടുക്കണമെന്നതടക്കം റോഡ്​ സുരക്ഷയുമായി ബന്ധപ്പെട്ട്​ നിയമങ്ങൾ ഉറപ്പുവരുത്താൻ കമീഷണർക്ക്​ ഹൈകോടതിയുടെ നിർദേശം. ഡ്യൂട്ടിയിലായിരിക്കെ ചില പൊലീസുകാർ നിരന്തരം മൊബൈൽ​ ​ഫോൺ ഉപയോഗിക്കുന്നത്​ ശ്രദ്ധയിൽപെട്ടിട്ടുണ്ട്​. ഔദ്യോഗിക ആവശ്യത്തിനോ അത്യാവശ്യത്തിനോ അല്ലാതെ ഡ്യൂട്ടിയിലിരിക്കെ ഫോൺ ഉപയോഗിക്കുന്ന പൊലീസുകാർക്കെതിരെ പൊതുജനങ്ങൾക്ക്​ ​പരാതി നൽകാം. വിഡിയോ പകർത്തി ഉന്നത അധികാരികളെ അറിയിച്ചാൽ നടപടിയെടുക്കണമെന്നും ഇക്കാര്യത്തിൽ കമീഷണർ നടപടി ഉറപ്പുവരുത്തണമെന്നും​ ജസ്റ്റിസ്​ അമിത്​ റാവൽ നിർദേശിച്ചു. ​പാർക്കിങ്​ സൗകര്യങ്ങളടക്കവും റോഡ്​ സുരക്ഷയുമായി ബന്ധപ്പെട്ട കേസുകൾ പരിഗണിക്കുമ്പോഴാണ്​ കോടതിയുടെ നിർദേശം. ഉത്തരവുണ്ടായിട്ടും വാഹനങ്ങൾ വലിയ ശബ്​ദത്തിൽ ഹോൺ മുഴക്കുന്നത്​ പതിവാണെന്ന്​ കോടതി ചൂണ്ടിക്കാട്ടി. പ്രഷർ ഹോണുകൾ നീക്കാൻ ഉടമകൾക്ക്​ നിർദേശം നൽകണം. നിശ്ചയിച്ച സ്​റ്റോപ്പുകളിലല്ലാതെ വാഹനം നിർത്തി ബസുകളും ​ഓട്ടോകളും യാത്രക്കാരെ കയറ്റുന്നതിനെതിരെ കർശന നടപടിയെടുക്കണം. ഓട്ടോകളും മറ്റും പിന്നിലെ വാഹനത്തിന്‍റെ ഗതി കണ്ണാടി നോക്കി മനസ്സിലാക്കാതെ വലത്തോട്ട്​ വെട്ടിത്തിരിക്കുന്നതിനെതിരെ നടപടി വേണം. വാഹനങ്ങളിൽ കണ്ണാടികൾ ഉറപ്പുവരുത്തണം. പരാതി നൽകാൻ വാഹനങ്ങളിലും ഓട്ടോകളടക്കം യാത്രാ വാഹനങ്ങളിൽ രണ്ട്​ ടോൾ ഫ്രീ നമ്പറുകൾ രേഖപ്പെടുത്തണം. പരാതി ലഭിച്ചാൽ പരിശോധിച്ച്​ നടപടിയെടുക്കണം. ആവശ്യമുള്ള സ്ഥലങ്ങളിൽ നോ ഹോൺ, സൈലന്‍റ്​ സോൺ ബോർഡുകൾ മൂന്നാഴ്ചക്കകം സ്ഥാപിക്കണമെന്നും കോടതി നിർദേശിച്ചു. ഹരജി വീണ്ടും ആഗസ്റ്റ്​ 31ന്​ പരിഗണിക്കാൻ മാറ്റി.