ലോക കേരളസഭ: യൂസുഫലിയെ വിമർ​ശിച്ചത്​ അപലപനീയം -വെള്ളാപ്പള്ളി

ചേർത്തല: പ്രതിപക്ഷം ലോക കേരളസഭ ബഹിഷ്‌കരിച്ചതിനെതിരെ അഭിപ്രായം പറഞ്ഞതിന്‍റെ പേരിൽ പ്രവാസി വ്യവസായി എം.എ. യൂസുഫലിയെ വിമർശിച്ചത് അപലപനീയമാണെന്ന്​ എസ്​.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. പ്രവാസികളുടെ കാര്യത്തിൽ ഭരണപക്ഷവും പ്രതിപക്ഷവും ഒന്നിച്ചുനിൽക്കണമെന്നാണ് യൂസുഫലി പറഞ്ഞത്. പ്രവാസിലോകം അംഗീകരിക്കുകയും ബഹുമാനിക്കുകയും ചെയ്യുന്ന അദ്ദേഹത്തിന്‍റെ അനുഭവസമ്പത്തും ബന്ധങ്ങളും കേരളം ഉപയോഗപ്പെടുത്തുകയാണ് വേണ്ടത്. അദ്ദേഹത്തെ രാഷ്ട്രീയ വിവാദങ്ങളിലേക്ക് വലിച്ചിഴക്കരുതായിരുന്നുവെന്ന്​ വെള്ളാപ്പള്ളി മാധ്യമപ്രവർത്തകരോട്​ പറഞ്ഞു.​ ലോക കേരളസഭയെ അധിക്ഷേപിക്കുന്നവർ കാലഘട്ടത്തെ പിന്നാക്കം നടത്തുന്നവരാണ്​. സംഘാടനച്ചെലവ് ഈ പരിപാടിയുടെ വലുപ്പം ​വെച്ചുനോക്കുമ്പോൾ നിസ്സാരമാണ്. പ്രതിപക്ഷം മാത്രമല്ല, എല്ലാ രാഷ്ട്രീയ പാർട്ടികളും ലോക കേരളസഭക്ക്​ പ്രത്യേക പരിഗണന നൽകണമെന്നും വെള്ളാപ്പള്ളി ആവശ്യപ്പെട്ടു.