വാളകം പഞ്ചായത്തിൽ മനുഷ്യരെയും മൃഗങ്ങളെയും കടിച്ച നായ്​ക്ക് പേ വിഷബാധ

മൂവാറ്റുപുഴ: വാളകം ഗ്രാമപഞ്ചായത്തിലെ റാക്കാട്, ശക്തി പുരം, കാരനാട്ട് കാവുംപടി, വാണുകുഴിത്താഴം, കരിപാച്ചിറ ഭാഗങ്ങളിൽ കഴിഞ്ഞദിവസം മനുഷ്യരെയും മൃഗങ്ങളെയും ആക്രമിക്കുകയും കടിക്കുകയും ചെയ്ത തെരുവുനായ്​ക്ക് പേവിഷബാധയേറ്റതായി പരിശോധനയിൽ കണ്ടെത്തി. കഴിഞ്ഞ ബുധനാഴ്ച ഉച്ചയോടെ നാട്ടുകാർ നടത്തിയ തിരച്ചിലിൽ ആളൊഴിഞ്ഞ പറമ്പിലാണ് നായെ ചത്തനിലയിൽ കണ്ടെത്തിയത്. തുടർന്ന് പേവിഷ ബാധയുണ്ടോ എന്നറിയാൻ മണ്ണുത്തി വെറ്ററിനറി സർവകലാശാലയിൽ പോസ്റ്റ്​മോർട്ടത്തിന്​ അയച്ചിരുന്നു. ഫലം വന്നപ്പോഴാണ് നായ്ക്ക് പേവിഷബാധ സ്ഥിരീകരിച്ചത്. അലഞ്ഞുതിരിഞ്ഞുനടന്ന തെരുവുനായ്​ വിദ്യാർഥി അടക്കം അഞ്ചുപേരെയും പത്തോളം വളർത്തുമൃഗങ്ങളെയും കടിച്ചിരുന്നു. കടിയേറ്റ മൃഗങ്ങൾക്ക് രണ്ട് ഡോസ് പ്രതിരോധ മരുന്നുകൾ നൽകി. കടിയേറ്റ നാലുപേരും നിരീക്ഷണത്തിലാണ്.