ഓടിക്കൊണ്ടിരിക്കെ വാഹനത്തി​ലെ ഫർണിച്ചറുകള്‍ക്ക് തീപിടിച്ചു

അമ്പലപ്പുഴ: ഓടിക്കൊണ്ടിരിക്കെ വാഹനത്തിലുണ്ടായിരുന്ന ഫർണിച്ചറുകള്‍ക്ക് തീപിടിച്ചു. ആര്‍ക്കും പരിക്കില്ല. ദേശീയപാതയിൽ പറവൂർ ജങ്​ഷന് സമീപം വെള്ളിയാഴ്ച രാത്രിയാണ്​ അപകടം. വീട് മാറുന്നതിന്‍റെ ഭാഗമായി കാസകോടുനിന്ന്​ ഫർണിച്ചറുമായി കരുനാഗപ്പള്ളിയിലേക്ക് പോയ മിനി ലോറിയിലാണ് തീ പിടിച്ചത്. ലോറിയിലുണ്ടായിരുന്ന ഫർണിച്ചറുകള്‍ക്ക് തീ പിടിക്കുന്നതുകണ്ട് പിന്നാലെ വന്ന വാഹനങ്ങളിലെത്തിയവരാണ് ഡ്രൈവറെ വിവരം അറിയിച്ചത്. വാഹനം ദേശീയപാതയോരത്ത് നിര്‍ത്തിയിട്ട് നാട്ടുകാര്‍ ചേര്‍ന്ന് തീ അണക്കാന്‍ ശ്രമിച്ചു. വിവരമറിഞ്ഞ് ആലപ്പുഴയില്‍നിന്ന്​ രണ്ട് യൂനിറ്റ് അഗ്​നിരക്ഷാ സംഘവുമെത്തി. കത്തിക്കൊണ്ടിരുന്ന ഫർണിച്ചറുകള്‍ വാഹനത്തില്‍നിന്ന്​ നീക്കി തീ അണച്ചു. സംഭവത്തെ തുടര്‍ന്ന് ഗതാഗതം തടസ്സപ്പെട്ടു. തുടര്‍ന്ന് വാഹനങ്ങള്‍ പഴയനടക്കാവ് റോഡ് വഴി തിരിച്ചുവിട്ട് ഗതാഗതം നിയന്ത്രിച്ചു. (ദേശീയപാതയിൽ മിനിലോറിയിൽ ​കൊണ്ടുപോയ ഫർണിച്ചറുകള്‍ക്ക് തീപിടിച്ചപ്പോള്‍)