മെഡിക്കൽ കോളജ്​ ശുചിമുറിയിൽ വയോധികൻ ഞരമ്പ് മുറിഞ്ഞ് മരിച്ചനിലയിൽ

കളമശ്ശേരി: ഗവ. മെഡിക്കൽ കോളജിൽ ചികിത്സയിൽ കഴിഞ്ഞ വയോധികനെ ശുചിമുറിയിൽ കൈഞരമ്പ് മുറിഞ്ഞ് ചോരവാർന്ന് മരിച്ചനിലയിൽ കണ്ടെത്തി. കോതമംഗലം, ഈഞ്ചക്കണ്ടം, പിണ്ടിമന, പാത്തിക്കൽ വീട്ടിൽ തങ്കപ്പനാണ്​ (77) മരിച്ചത്. 18ന് രാവിലെ എട്ടരയോടെയാണ് വാർധക്യസഹചമായ അസുഖത്തെ തുടർന്ന് ഇയാളെ മെഡിക്കൽ കോളജിൽ പ്രവേശിപ്പിച്ചത്. 22ന് ബുധനാഴ്ച വൈകീട്ട് 6.35 ഓടെയാണ് ഇടതുകൈയിലെ ഞരമ്പ് മുറിഞ്ഞ് ചോരവാർന്ന് അബോധാവസ്ഥയിൽ കണ്ടെതെന്ന്​ പൊലീസ് പറഞ്ഞു. തുടർന്ന് തീവ്രപരിചരണ വിഭാഗത്തിൽ പ്രവേശിപ്പിച്ചെങ്കിലും മരിച്ചു. വെള്ളിയാഴ്ച രാവിലെ പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടുനൽകി. മെഡിക്കൽ കോളജിലെ ഡോ. ടെസ ചാർളിയുടെ പരാതിയിൽ അസ്വാഭാവിക മരണത്തിന് കേസെടുത്തു.