പ്ലസ്​ വൺ സീറ്റ്​: മലബാറിനോടുള്ള വിവേചനം അവസാനിപ്പിക്കണം -​മലബാർ എജുക്കേഷൻ മൂവ്​മെന്‍റ്​

കൊച്ചി: പ്ലസ്​ വൺ സീറ്റുകളു​ടെ എണ്ണത്തിൽ മലബാറിനോടുള്ള വിവേചനം അവസാനിപ്പിക്കണമെന്ന്​ മലബാർ എജുക്കേഷൻ മൂവ്​മെന്‍റ്​. വിദ്യാഭ്യാസ വിഭവങ്ങളുടെ അസന്തുലിത വിതരണത്തിനിരയാണ്​ മലബാറിലെ വിദ്യാർഥികളെന്ന്​ മൂവ്​മെന്‍റ്​ ചെയർമാൻ ഡോ. കെ.കെ.എൻ. കുറുപ്പ്​ പറഞ്ഞു​. ഓരോ അധ്യയനവർഷവും മലബാർ ജില്ലകളിലെ സീറ്റ്​ ക്ഷാമം പതിവ്​ ചർച്ചയാകുന്നതിനപ്പുറം കാര്യമായ നടപടിയുണ്ടാകുന്നില്ല. ഓരോ വർഷവും പതിനായിരക്കണക്കിന്​ വിദ്യാർഥികളാണ്​ ഓപൺ സ്കൂളിൽ ചേരാൻ നിർബന്ധിതരാകുന്നത്​. 60-65 വിദ്യാർഥികൾ പഠിക്കുന്ന ക്ലാസുകളിൽ സീറ്റുകൾ കൂട്ടി പ്രശ്നം പരിഹരിക്കാമെന്ന വിദ്യാഭ്യാസ മന്ത്രിയുടെ നിലപാട്​ അശാസ്ത്രീയമാണ്​. തെക്കൻ കേരളത്തിൽ ഉള്ളതിന്​ ആനുപാതികമായി ഹൈസ്കൂളുകൾ മലബാറിൽ ഇല്ല എന്ന വസ്തുത മനസ്സിലാക്കി പ്രശ്നം പരിഹരിക്കാൻ സർക്കാറുകൾ സന്നദ്ധമാവാത്തതാണ്​ പ്രശ്നം ഗുരുതരമാക്കുന്നത്​. ഉന്നത വിദ്യാഭ്യാസരംഗത്ത്​ ഈ വിടവ്​ കൂടിവരുകയാ​ണെന്നും അദ്ദേഹം പറഞ്ഞു. തൃശൂർ ജില്ലയിൽ 1330 പ്ലസ്​ വൺ സീറ്റുകളുടെ കുറവാണുള്ളത്​. പാലക്കാട്​ 10,132 സീറ്റിന്‍റെയും മലപ്പുറത്ത്​ 30,941 സീറ്റിന്‍റെയും കുറവുണ്ട്​​. കോഴിക്കോട് 8579, വയനാട്​ 2232, കണ്ണൂർ 5356, കാസർകോട്​ 3723 എന്നിങ്ങനെയും സീറ്റ്​ കുറവുകളുണ്ട്​. അതേസമയം, തെക്കൻ ജില്ലകളിലെല്ലാം സീറ്റുകൾ​ അധികമാണ്​​. താൽക്കാലിക പരിഹാരമെന്നതിനുപകരം മലബാറിന്‍റെ വിദ്യാഭ്യാസ പിന്നാക്കാവസ്ഥ പരിഹരിക്കാൻ സർക്കാർ ഇടപെടണമെന്നും സംഘാടകർ വാർത്തസമ്മേളനത്തിൽ ആവശ്യപ്പെട്ടു. ജനറൽ സെക്രട്ടറി അക്ഷയ്​ കുമാർ, സി.ഇ.ഒ മഞ്ജുദേവ്​, കോഓഡിനേറ്റർ ഖദീജ തസ്​നിം, ഷിഹാബുദ്ദീൻ റാവുത്തർ, ഡോ. പി.പി. മുഹമ്മദ്​ കുട്ടി എന്നിവർ പ​ങ്കെടുത്തു.