ജോബി മാത്യുവിന് സ്വീകരണം

നെടുമ്പാശ്ശേരി: ദക്ഷിണ കൊറിയയിൽ നടന്ന രാജ്യാന്തര പാരാ പവർ ലിഫ്റ്റിങ് ചാമ്പ്യൻഷിപ്പിൽ നാല് സ്വർണം നേടിയ ജോബി മാത്യുവിന് വിമാനത്താവളത്തിൽ സ്വീകരണം നൽകി. ഏഷ്യ - ഓഷ്യാനിയ ഓപൺ വിഭാഗത്തിൽ പുരുഷന്മാരുടെ മാസ്റ്റേഴ്സ് മത്സരത്തിലാണ് (59 കിലോ) ജോബിയുടെ നേട്ടം. ജനറൽ വിഭാഗത്തിൽ 148 കിലോ ഉയർത്തിയതോടെ ലോക റാങ്കിങ്ങിൽ എട്ടാമതെത്തി. ഏറ്റവും മികച്ച ലിഫ്റ്റിലും ടോട്ടൽ ലിഫ്റ്റിലും ഒന്നാമതെത്തി. ഇതോടെ വരുന്ന ഏഷ്യൻ പാരാ ഗെയിംസിനും യോഗ്യത നേടി. അടുത്ത വർഷം ഏഷ്യൻ ഗെയിംസിനൊപ്പമാണ് ഏഷ്യൻ പാരാ ഗെയിംസ് നടക്കുക. മാസ്റ്റേഴ്സ് വിഭാഗത്തിൽ ആദ്യമായാണ് ഒരു ഇന്ത്യക്കാരൻ ഈ നേട്ടം കൈവരിക്കുന്നത്. നാട്ടിൽ തിരിച്ചെത്തിയ ജോബി മാത്യുവിനെയും ഇന്ത്യയെ പ്രതിനിധാനം ചെയ്ത്​ 80 കിലോ വിഭാഗത്തിൽ മത്സരിച്ച ആലപ്പുഴ, ഹരിപ്പാട് സ്വദേശി അബ്ദുൽ സലാമിനെയും എയർപോർട്ടിൽ പഞ്ചഗുസ്തി സംസ്ഥാന പ്രസിഡന്‍റും ആലുവ എം.എൽ.എയുമായ അൻവർ സാദത്തിന്‍റെ നേതൃത്വത്തിൽ വിവിധ സംഘടനാ ഭാരവാഹികളും ചേർന്ന് സ്വീകരിച്ചു.