ഭാരത്​ മാതാ കോളജിൽ എസ്.എഫ്.ഐ-കെ.എസ്.യു സംഘർഷം

കാക്കനാട്: തൃക്കാക്കര ഭാരത് മാതാ കോളജിൽ എസ്.എഫ്.ഐ, കെ.എസ്.യു പ്രവർത്തകർ തമ്മിൽ സംഘർഷം. കോളജ് അധികൃതരുടെ വിദ്യാർഥി വിരുദ്ധ നടപടിക്കെതിരെ എസ്.എഫ്.ഐയുടെ നേതൃത്വത്തിൽ സമരങ്ങൾ നടക്കുന്നുണ്ടായിരുന്നു. തിങ്കളാഴ്ച രാവിലെ കോളജ് ഗേറ്റിന് മുന്നിൽ നടന്ന സമരത്തെ ചൊല്ലി എസ്.എഫ്.ഐ-കെ.എസ്.യു പ്രവർത്തകർ തമ്മിൽ വാക്കേറ്റമുണ്ടായി. ഇത് സംഘർഷത്തിൽ കലാശിക്കുകയായിരുന്നു. എസ്.എഫ്.ഐ കോളജ് യൂനിറ്റ് ജോ. സെക്രട്ടറിയായ സഹൽ, പ്രസിഡന്റ്‌ മുഹമ്മദ്‌ ഷിൻ, സെക്രട്ടറി കെ.ബി. നീരജ്, യൂനിറ്റ് അംഗം സാധിർ, കെ.എസ്.യു യൂനിറ്റ് പ്രസിഡൻറ് ജയ്ഡൻ ജോൺസൻ തുടങ്ങിയവർക്ക് പരിക്കേറ്റിട്ടുണ്ട്. തൃക്കാക്കര പൊലീസ് അന്വേഷണം ആരംഭിച്ചിട്ടുണ്ട്.