നടുറോഡിൽ ബസ് ജീവനക്കാർ ഏറ്റുമുട്ടി; നാലു പേർക്കെതിരെ കേസ്

കളമശ്ശേരി: സമയക്രമത്തെക്കുറിച്ചുള്ള തർക്കം കൈയാങ്കളിയായി. നടുറോഡിൽ ബസ്​ ജീവനക്കാർ പരസ്പരം ഏറ്റുമുട്ടി. ദേശീയപാതയിൽ ടോൾ ബസ്​സ്റ്റോപ്പിന് സമീപം രാവിലെ ഒമ്പതരയോടെയാണ് സംഭവം. ആലുവ-എറണാകുളം ഭാഗത്തേക്കുള്ള കുമ്പളങ്ങി, തേവര റൂട്ടിൽ ഓടുന്ന ബസുകളിലെ ജീവനക്കാരാണ്​ ഏറ്റുമുട്ടിയത്. സ്ഥലത്തെത്തിയ കളമശ്ശേരി പൊലീസ് രണ്ട് ബസും ജീവനക്കാരെയും കസ്റ്റഡിയിലെടുത്തു. ജീവനക്കാരായ പെരുമ്പടപ്പ് സ്വദേശി കട്ടത്തറ സഹീർ (25), ചെല്ലാനം സ്വദേശി കളത്തുംമുറി അനന്തു (23), പള്ളുരുത്തി സ്വദേശി കട്ടങ്ങാഴത്ത് ഗുരുദത്ത് (21), വെങ്ങോല സ്വദേശി കറുക്കഞ്ചേരി മുഹമ്മദ് റിയാസ് (42) എന്നിവർക്കെതിരെ കേസെടുത്തു. റോഡിൽ ഗതാഗത തടസ്സം സൃഷ്ടിച്ച് ഭീകരാന്തരീക്ഷം ഉണ്ടാക്കിയതിനാണ് കേസെടുത്തതെന്ന് പൊലീസ് പറഞ്ഞു.