കൂലി വർധിപ്പിച്ചു; സ്വകാര്യ ബസ് തൊഴിലാളികളുടെ സൂചന പണിമുടക്ക് പിൻവലിച്ചു

പറവൂർ: വേതന വർധന ആവശ്യപ്പെട്ട്​ പ്രൈവറ്റ് ബസ് തൊഴിലാളി കോഓഡിനേഷൻ പറവൂർ - വൈപ്പിൻ മേഖല കമ്മിറ്റി 20ന് നടത്താനിരുന്ന സൂചന പണിമുടക്ക് പിൻവലിച്ചു. ജില്ല ഡെപ്യൂട്ടി ലേബർ ഓഫിസർ വിനോദ് കുമാറിന്‍റെ സാന്നിധ്യത്തിൽ നടന്ന ചർച്ചയിൽ വേതന വർധനക്ക്​ തീരുമാനമായതോടെയാണ് പണിമുടക്ക് വേണ്ടെന്നുവെച്ചത്. ഡ്രൈവർക്ക് 1200, കണ്ടക്ടർക്ക് 1000, ഡോർ ചെക്കർക്ക് 850 രൂപ വീതം ഇതിന്‍റെ ഭാഗമായി ലഭിക്കും. മുമ്പ്​ യഥാക്രമം 940, 850, 700 രൂപയാണ് ലഭിച്ചിരുന്നത്. കോഓഡിനേഷൻ ചെയർമാൻ എം.ജെ. രാജു, കൺവീനർ കെ.എ. അജയകുമാർ, ട്രഷറർ കെ.ഡി. സിനോജ് എന്നിവർ ചർച്ചക്ക് നേതൃത്വം നൽകി.