സ്വപ്നയുടെ അഭിഭാഷകൻ മുൻകൂർ ജാമ്യഹരജി നൽകി

കൊച്ചി: മതവിദ്വേഷം വളർത്തുന്ന ഫേസ്ബുക്ക്​ പോസ്റ്റിന്‍റെ പേരിലെടുത്ത കേസിൽ സ്വപ്ന സുരേഷിന്‍റെ അഭിഭാഷകൻ ആർ. കൃഷ്ണരാജ്​ ഹൈകോടതിയിൽ മുൻകൂർ ജാമ്യഹരജി നൽകി. താൻ സ്വപ്നക്കുവേണ്ടി കോടതിയിൽ ഹാജരാകുന്നത്​ തടയാനാണ് ജാമ്യമില്ലാ കുറ്റം ചുമത്തി കേസെടുത്തിരിക്കുന്നതെന്ന്​ ചൂണ്ടിക്കാട്ടിയാണ്​ കൃഷ്ണരാജിന്‍റെ ഹരജി. ഇസ്​ലാം വിശ്വാസ​പ്രകാരമുള്ള വേഷമണിഞ്ഞ്​ കെ.എസ്.ആർ.ടി.സി ബസ് ഓടിക്കുന്നുവെന്ന പേരിൽ ചിത്രമിട്ട്​ മതസ്പർധ വളർത്തുന്ന കുറിപ്പ്​ പോസ്​റ്റ്​ ചെയ്തതിനാണ്​ കൃഷ്ണരാജിനെതിരെ കേസെടുത്തിരിക്കുന്നത്​. മുഖ്യമന്ത്രിക്കും കുടുംബത്തിനുമെതിരെ സ്വപ്ന ചില വെളിപ്പെടുത്തലുകൾ നടത്തിയതിന്‍റെ ശത്രുത മുഖ്യമന്ത്രിക്ക്​ തന്നോടുണ്ട്​. ഇതിന്‍റെ പകപോക്കലായാണ്​ സ്വപ്നയുടെ അഭിഭാഷകനായ തനിക്കെതിരെ കേസെടുത്തിരിക്കുന്നത്​. ചിത്രമെടുത്തതും സമൂഹമാധ്യമങ്ങളിലൂടെ പ്രചരിപ്പിച്ചതും താനല്ല. പരിഹാസ രൂപേണയുള്ള വിമർശനം ഉന്നയിക്കുക മാത്രമാണ്​ 33 വർഷമായി അഭിഭാഷകനായ താൻ ചെയ്തതെന്നും ഹരജിയിൽ പറയുന്നു.