സ്വപ്​നയുടെ രഹസ്യമൊഴി ഇ.ഡിക്ക്​

കൊച്ചി: യു.എ.ഇ കോൺസുലേറ്റിന്‍റെ നയതന്ത്ര ചാനൽ വഴി സ്വർണം കടത്തിയ കേസിലെ പ്രതി സ്വപ്​ന സുരേഷ്​ നൽകിയ രഹസ്യമൊഴി എൻഫോഴ്​സ്​മൻെറ്​ ഡയറക്​ടറേറ്റിന്​ കൈമാറി. കഴിഞ്ഞ ദിവസം എറണാകുളം ജുഡീഷ്യൽ ഫസ്​റ്റ്​ ക്ലാസ്​ മജിസ്​ട്രേറ്റ്​ കോടതിയിൽ നൽകിയ മൊഴിയാണ്​ പ്രിൻസിപ്പൽ സെഷൻസ്​ കോടതിയുടെ നിർദേശപ്രകാരം ഇ.ഡിക്ക്​ ​കൈമാറിയത്​. അന്വേഷണ ഭാഗമായി രഹസ്യമൊഴി ലഭ്യമാക്കണമെന്ന ഇ.ഡിയുടെ അപേക്ഷയുടെ അടിസ്ഥാനത്തിലാണിത്​. അതിനിടെ, പൊലീസ്​ സംരക്ഷണം തേടി കോടതിയിൽ നൽകിയ അപേക്ഷ സ്വപ്​ന പിൻവലിച്ചു. പൊലീസ്​ സുരക്ഷക്ക്​ പകരം കേന്ദ്രസംരക്ഷണം ഒരുക്കണമെന്നാണ്​ സ്വപ്​നക്കുവേണ്ടി ഹാജരായ അഭിഭാഷകൻ ആവശ്യപ്പെട്ടത്​. ഇതുസംബന്ധിച്ച്​ സ്വപ്​ന കോടതിയിൽ ഹരജിയും നൽകിയിട്ടുണ്ട്​. എന്നാൽ, തങ്ങൾക്കുപോലും സുരക്ഷയില്ലെന്നും വ്യക്തികൾക്ക്​ സംരക്ഷണം നൽകുന്ന കാര്യത്തിൽ പരിമിതി ഉണ്ടെന്നും കോടതി ഉത്തരവുണ്ടായാൽ പരിഗണിക്കാമെന്നും ഇ.ഡിയുടെ അഭിഭാഷകൻ പറഞ്ഞു. സംരക്ഷണം ഒരുക്കുന്നത്​ സംബന്ധിച്ച ഇ.ഡിയുടെ മറുപടിക്കായി ഹരജി വ്യാഴാഴ്​ച പരിഗണിക്കാൻ മാറ്റി. കേരള പൊലീസിൽ വിശ്വാസമില്ലെന്നും മുഖ്യമന്ത്രി അടക്കം തെരുവിൽ ഭീഷണിപ്പെടുത്തുകയാണെന്നും താമസസ്ഥലത്ത്​ പൊലീസ്​ നിരീക്ഷിക്കുകയാണെന്നും ഹരജിയിൽ സ്വപ്​ന പറയുന്നുണ്ട്​.