ഷാജ്​ കിരണിനെ ദൂതനായി വിട്ട പൊലീസ്​ എനിക്ക്​ സംരക്ഷണം തരുമെന്ന്​ പറയുന്നത്​ അവിശ്വസനീയം -സ്വപ്​ന സുരേഷ്​

കൊച്ചി: തട്ടിപ്പുകാരനായ ഷാജ്​ കിരണിനെ കേസ്​ ഒത്തുതീർക്കാൻ വിട്ട അതേ പൊലീസ്​ തനിക്ക്​ സംരക്ഷണം തരുമെന്ന്​ പറയുന്നത്​ അവിശ്വസനീയമെന്ന് സ്വർണ തട്ടിപ്പ്​ കേസിലെ പ്രതി​ സ്വപ്​ന സുരേഷ്​. നിരവധി തവണയാണ്​ മുൻ വിജിലൻസ് മേധാവി എം.ആർ. അജിത്കുമാർ ഷാജ് കിരണുമായി ഫോണിൽ സംസാരിച്ചത്. ഞാൻ എവിടെ പോയി, എന്തിന്​ ​പോയി എന്നൊക്കെ ചോദിച്ച്​ പൊലീസ്​ കയറിയിറങ്ങി നടപ്പാണ്.​ അതുകൊണ്ടാണ്​ പൊലീസ് സംരക്ഷണം ഒഴിവാക്കി പകരം കേന്ദ്രസംരക്ഷണം ആവശ്യപ്പെട്ടത്. രഹസ്യമൊഴിയിൽ മുൻ മന്ത്രി കെ.ടി. ജലീൽ നടത്തിയ കുറ്റങ്ങളെല്ലാം ഉടൻ വെളിപ്പെടുത്തുമെന്ന് സ്വപ്‌ന ആവർത്തിച്ചു. കെ.ടി. ജലീലിനെതിരെ കൂടുതൽ വെളിപ്പെടുത്തലുമായി സ്വപ്ന പാലക്കാട്ട്​​ മാധ്യമങ്ങളെ കാണാനാണ്​ സാധ്യത. അഭിഭാഷകൻ ആർ. കൃഷ്ണരാജുമായി കൂടിക്കാഴ്ച നടത്താനായി കൊച്ചിയിലെത്തിയപ്പോഴാണ്​ മാധ്യമങ്ങളോട്​ സംസാരിച്ചത്​. മുഖ്യമന്ത്രിക്കും കുടുംബത്തിനുമെതിരായ മൊഴി പിൻവലിക്കാൻ സമ്മർദം ചെലുത്തിയെന്ന സ്വപ്‌നയുടെ വെളിപ്പെടുത്തലിനെത്തുടർന്ന് സംസ്ഥാനം വിട്ട ഷാജ് കിരണിനെയും ബിസിനസ് പങ്കാളി ഇബ്രായിയെയും പൊലീസിന് കണ്ടെത്താനായില്ല. അതേസമയം, പൊലീസ്​ ആവശ്യപ്പെട്ടാൽ ഹാജരാകുമെന്ന്​ ഇരുവരും അറിയിച്ചിട്ടുണ്ട്​. സ്വപ്നക്കെതിരായ വിഡിയോ വീണ്ടെടുക്കാനാണ്​ തങ്ങൾ തമിഴ്​നാട്ടിലേക്ക്​ പോയതെന്നാണ്​ ഇവർ പറയുന്നത്​. ഷാജ്​ കിരണിനെ അറിയില്ലെന്ന്​ പറയുന്ന ക്രമസമാധാനപാലനച്ചുമതലയുള്ള എ.ഡി.ജി.പി വിജയ് സാഖറെ പിന്നെ എന്തിനാണ്​ ഷാജുമായി മണിക്കൂറുകളോളം കൂടിക്കാഴ്​ച നടത്തിയതെന്ന്​ വ്യക്തമാക്കണമെന്ന്​ സ്വപ്ന ആവശ്യപ്പെട്ടു.