പട്ടിമറ്റം മോഷണം: സി.സി ടി.വി കേന്ദ്രീകരിച്ച് അന്വേഷണം

കിഴക്കമ്പലം: കഴിഞ്ഞ ദിവസം പട്ടിമറ്റത്ത് നടന്ന മോഷണവുമായി ബന്ധപ്പെട്ട് പൊലീസ് പരിസരത്തെ സി.സി ടി.വി കേന്ദ്രീകരിച്ച് അന്വേഷണം ഊർജിതമാക്കി. ചെങ്ങര തണ്ടക്കാല മീതിന്റെ വീട്ടിൽനിന്ന് 3.25 ലക്ഷം രൂപയും എട്ടര പവനുമാണ് മോഷണം പോയത്. പരിസരത്തെ മുഴുവൻ സി.സി ടി.വി ദൃശ്യങ്ങളും പൊലീസ് പരിശോധിച്ചു. സംശയം തോന്നിയ ചില ദൃശ്യങ്ങൾ പൊലീസ് പുറത്തുവിടുകയും അവരെ കണ്ടാൽ പൊലീസിൽ വിവരം നൽകണമെന്നും അറിയിച്ചിട്ടുണ്ട്. രണ്ടുമാസം മുമ്പ് പരിസരത്തെ ഒരു വീട്ടിൽനിന്ന് ഒരു ലക്ഷം രൂപയും അഞ്ചര പവനും മോഷണം പോയിരുന്നു. അന്ന് നാലുവീട്ടിലാണ് മോഷണം നടത്തിയത്. മോഷണം പെരുകുകയും പൊലീസിന് പ്രതികളെ പിടികൂടാൻ സാധിക്കാതെ വരുകയും ചെയ്തത് പ്രതിഷേധത്തിന്​ ഇടയാക്കിയിട്ടുണ്ട്. മഴക്കാലമായതോടെയാണ് പ്രദേശത്ത് മോഷണം വർധിച്ചത്.