ഭർത്താവിന്‍റെ മദ്യപാനം: തീകൊളുത്തിയ യുവതി മരിച്ചു

ഗാന്ധിനഗർ (കോട്ടയം): വിമുക്തഭടനായ ഭർത്താവിന്‍റെ അമിത മദ്യപാനത്തിൽ മനം നൊന്ത്​ മണ്ണെണ്ണ ഒഴിച്ച്​ സ്വയം തീകൊളുത്തി പൊള്ളലേറ്റ്​ കോട്ടയം മെഡിക്കൽ കോളജ് ആശുപത്രിയിൽ ചികിത്സയിലിരുന്ന യുവതി മരിച്ചു. പത്തനംതിട്ട നാരങ്ങാനം കണമുക്ക് തിരുവാതിരയിൽ പ്രേമിന്‍റെ ഭാര്യ രാജിയാണ്​ (39) മരിച്ചത്. ഭാര്യയെ രക്ഷിക്കാനുള്ള ​ശ്രമത്തിൽ ​പൊള്ളലേറ്റ്​ കോട്ടയം മെഡിക്കൽ കോളജ് ബേൺസ് യൂനിറ്റിൽ ചികിത്സയിൽ കഴിയുന്ന പ്രേമിന്‍റെ ആരോഗ്യനില തൃപ്തികരമെന്ന് ഡോക്ടർമാർ അറിയിച്ചു. കഴിഞ്ഞ ചൊവ്വാഴ്ച രാത്രി 9.30ന് കണമുക്ക്​ തറഭാഗത്തെ വീട്ടിലായിരുന്നു സംഭവം. പിതാവിന്‍റെ മദ്യപാനത്തിൽ മനം നൊന്ത്​ അമ്മ മണ്ണെണ്ണ ഒഴിച്ച്​ തീകൊളുത്തിയതാണെന്ന്​ മക്കൾ പൊലീസിൽ മൊഴി നൽകിയിട്ടുണ്ട്​. സംഭവം നടക്കുന്നതിനുമുമ്പ്​ ഇരുവരും തമ്മിൽ വഴക്കുണ്ടായി. തുടർന്ന്, ടിന്നിൽനിന്ന്​ രാജി മണ്ണെണ്ണ എടുത്ത് ശരീരത്തിലേക്ക്​ ഒഴിച്ചശേഷം ലൈറ്റർ ഉപയോഗിച്ച് തീ കൊളുത്തുകയായിരുന്നു. വെള്ളിയാഴ്ച രാവിലെയാണ്​ രാജി മരിച്ചത്​. മൃതദേഹം മെഡിക്കൽ കോളജ് മോർച്ചറിയിൽ. കേസ് എടുത്തതായി ആറന്മുള പൊലീസ് അറിയിച്ചു. സംസ്കാരം ഞായറാഴ്ച രാവിലെ രാജിയുടെ കുടുംബ വീട്ടിൽ. ---- KTD RAJI 39