ബഫര്‍ സോണ്‍: സുപ്രീംകോടതി വിധി ആശങ്കജനകം -കെ.സി.ബി.സി

കൊച്ചി: വന്യജീവി സങ്കേതങ്ങള്‍ക്കും ദേശീയ സംരക്ഷിത ഉദ്യാനങ്ങള്‍ക്കും ഒരു കിലോമീറ്റര്‍ മുതല്‍ ചുറ്റളവില്‍ ബഫര്‍ സോണ്‍ നിര്‍ബന്ധമാക്കിയ സുപ്രീംകോടതി വിധി ഏറെ ദുഃഖകരമാണെന്ന്​ കെ.സി.ബി.സി. മലയോര കര്‍ഷകരുടെയും വനാതിര്‍ത്തികളില്‍ വസിക്കുന്നവരുടെയും ജീവിതം ദുരിതപൂര്‍ണമാക്കുന്നതാണിത്​. കേരളത്തിലെ 24 വന്യജീവി സങ്കേതങ്ങള്‍ക്ക്​ ചുറ്റുമായി നാലുലക്ഷം ഏക്കര്‍ ഇതോടെ ബഫര്‍ സോണായി. ഇവിടെ വസിക്കുന്ന ഒന്നര ലക്ഷത്തോളം കുടുംബങ്ങള്‍ വഴിയാധാരമാകുന്ന അവസ്ഥയാണ്. വ്യാഴവട്ടക്കാലമായി കര്‍ഷകര്‍ ഉന്നയിക്കുന്ന ആവശ്യങ്ങളൊന്നും കോടതിയില്‍ ബോധ്യപ്പെടുത്താന്‍ സര്‍ക്കാറിന്​ കഴിഞ്ഞില്ല. പരിസ്ഥിതി സംരക്ഷണം എക്കാലവും സഭയുടെ പ്രഖ്യാപിതനയമാണ്. എന്നാല്‍, പരിസ്ഥിതി സംരക്ഷണത്തിന്‍റെ ഭാരം മുഴുവന്‍ വനാതിര്‍ത്തികളില്‍ താമസിക്കുന്നവരുടെമേല്‍ അടിച്ചേൽപിക്കുന്നത് നീതിയല്ല. ബഫര്‍ സോണിലെ കര്‍ഷകരുടെ ആശങ്കകള്‍ പരിഹരിക്കാന്‍ സര്‍ക്കാറുകൾ സത്വരമായി ഇടപെടണമെന്നും പ്രസിഡന്‍റ്​ കര്‍ദിനാള്‍ മാര്‍ ജോര്‍ജ് ആലഞ്ചേരി ആവശ്യപ്പെട്ടു.