കെ.എസ്.ആർ.ടി.സി ബസുകൾ ക്ലാസ്​ മുറികളാക്കുന്നതിനെ വിമർശിച്ച്​ ഹൈകോടതി

കൊച്ചി: കെ.എസ്.ആർ.ടി.സി ബസുകൾ ക്ലാസ്​ മുറികളാക്കുന്നത്​ നിർത്തി അവ സർവിസിന്​ ഉപയോഗിക്കണമെന്ന്​ ഹൈകോടതി. എത്രകാലം കുട്ടികളെ ഇങ്ങനെ പഠിപ്പിക്കാൻ കഴിയും. ചിലരുടെ താൽപര്യം സംരക്ഷിക്കാൻ ചിലത്​ ചെയ്ത്​ അവസാനം ബാധ്യതയാവുകയാണ്​. സ്ഥാപനം നന്നായി കൊണ്ടുപോകാൻ ചിലർക്ക്​ താൽപര്യമില്ല. ശമ്പളവും പെൻഷനും നൽകാൻ വായ്‌പയെടുക്കുന്ന കമ്പനി എങ്ങനെ ഈ രീതിയിൽ മുന്നോട്ടുപോകുമെന്നും ജസ്റ്റിസ്​ ദേവൻ രാമചന്ദ്രൻ ആരാഞ്ഞു. ശമ്പളം വൈകുന്നതിനെതിരായ ഹരജികൾ പരിഗണിക്കവേയായിരുന്നു​ ഈ നിരീക്ഷണം​. സമരം തുടരുകയാണെങ്കിൽ ഈ വിഷയത്തിൽ ഇടപെടില്ലെന്നും കോടതിയിൽ വിശ്വാസമുണ്ടെങ്കിൽ സമരം തുടരരുതെന്നും സിംഗിൾ ബെഞ്ച്​ ആവശ്യപ്പെട്ടു. ഒരു മാസം 180 കോടി രൂപയാണ് കോർപറേഷന്‍റെ വരുമാനം. ഇതിൽ ഡീസലിന് മാസം 92 കോടി വേണം. ബസുകൾ യാർഡുകളിൽ കിടന്ന്​ തുരുമ്പെടുക്കുന്നു. കെ.എസ്.ആർ.ടി.സിയുടെ വിശദീകരണത്തിൽ ബാധ്യതകളുടെയും പരാധീനതകളുടെയും വിവരങ്ങൾ മാത്രമാണുള്ളത്. ജീവനക്കാർക്ക്​ ശമ്പളത്തെക്കുറിച്ച്​ മാത്രമാണ് ആശങ്ക. മറ്റ്​ ആശങ്കകൾ മാനേജ്മെന്‍റിനാണ് ഉണ്ടാകേണ്ടത്. നഷ്ടത്തിലായിരുന്ന എയർ ഇന്ത്യ മറ്റൊരാൾ ഏറ്റെടുത്തപ്പോൾ എങ്ങനെയാണ്​ ലാഭത്തിലായത്​. 10 വർഷമായി കെ.എസ്​.ആർ.ടി.സി നഷ്ടത്തിലാണെന്ന്​ പറയുന്നു. ഇത്​ പരിഹരിക്കാനാണ്​ നടപടിയുണ്ടാകേണ്ടത്​. ബസുകൾ തുരുമ്പ് വിലയ്ക്ക്​ വിൽക്കുകയല്ല, സർവിസ് നടത്തി നേട്ടമുണ്ടാക്കുകയാണ് വേണ്ടത്. ഇങ്ങനെ പോയാൽ കെ.എസ്.ആർ.ടി.സി ഇടിച്ചു നിൽക്കും. ഇതിൽനിന്ന്​ തലയൂരാൻ നോക്കുകയല്ല സർക്കാർ ചെയ്യേണ്ടത്​. 2020ൽ തമിഴ്‌നാട്ടിലെ അവിനാശിയിലുണ്ടായ ബസപകടത്തിൽ മരിച്ച കെ.എസ്.ആർ.ടി.സി ഡ്രൈവർ വി.ഡി. ഗിരീഷ്, കണ്ടക്‌ടർ വി.ആർ. ബൈജു എന്നിവർ ഏറ്റവും മികച്ച ജീവനക്കാരായിരുന്നുവെന്ന്​ കോടതി അനുസ്മരിച്ചു. സ്ഥാപനത്തോടും യാത്രക്കാരോടും ഏറെ കരുതലും സ്നേഹവും കാട്ടിയിരുന്നു. ഒരിക്കൽ യാത്രക്കിടെ നെഞ്ചുവേദന അനുഭവപ്പെട്ട യാത്രക്കാരിയെ ആശുപത്രിയിൽ എത്തിക്കാനും പരിചരിക്കാനും അവർ മനസ്സുകാട്ടി. ജീവനക്കാരായാൽ അങ്ങനെ വേണം. മിണ്ടിയാൽ അവകാശത്തെക്കുറിച്ചുമാത്രം പറയുന്നവർ ഇവരുടെ സേവനങ്ങൾ വിസ്മരിക്കരുതെന്നും കോടതി പറഞ്ഞു.