ലക്ഷദ്വീപ്​ ജനതയോടുള്ള അവഗണന; എൻ.സി.പി ഹൈകോടതിയിലേക്ക്​

കൊച്ചി: ലക്ഷദ്വീപ്​ ജനതയോട്​ കേ​ന്ദ്രസർക്കാറും അഡ്​മിനിസ്​ട്രേറ്ററും സ്വീകരിക്കുന്ന അവഗണനക്കും ദ്രോഹ നടപടികൾക്കുമെതിരെ ​ഹൈകോടതിയിൽ​ പൊതുതാൽപര്യ ഹരജി നൽകുമെന്ന്​ എൻ.സി.പി ലക്ഷദ്വീപ്​ ഘടകം പ്രസിഡന്‍റ്​ അബ്​ദുൽ മുത്തലീഫ്​ അറിയിച്ചു. ഗുരുതര യാത്രാപ്രശ്നമാണ്​ ദ്വീപിലെ ജനങ്ങൾ നേരിടുന്നത്. ഏഴ്​ യാത്രക്കപ്പൽ ഉണ്ടായിരുന്നത്​ രണ്ടായി കുറച്ചു. കപ്പൽ അറ്റകുറ്റപ്പണിക്ക്​ ബജറ്റിൽ തുക വകയിരുത്താതിരുന്നതാണ്​ ഈ അവസ്ഥയിലേക്ക്​ എത്തിച്ചത്​. ച​രക്കുഗതാഗതം നിർത്തിയത്​ ദ്വീപിൽ ഭക്ഷ്യക്ഷാമം സൃഷ്ടിക്കുമെന്നും അദ്ദേഹം പറഞ്ഞു. മൂവായിരത്തിൽപരം ലക്ഷദ്വീപ്​ നിവാസികളാണ്​ യാത്രപ്രശ്നം കാരണം ​ദ്വീപിന്​ പുറത്ത്​ കുടുങ്ങിയിരിക്കുന്നത്​. യാത്ര മുടങ്ങിയതിനാൽ അവർക്ക്​ നഷ്ടപരിഹാരമെങ്കിലും നൽകണം. അവഗണനക്കെതിരെ കവരത്തിയിൽ പ്രതിഷേധിച്ച എൻ.സി.പി നേതാക്കളെയും പ്രവർത്തകരെയും അറസ്റ്റ്​ ചെയ്തു. ജനാധിപത്യപരമായ പ്രതിഷേധം പോലും ദ്വീപിൽ അനുവദിക്കുന്നില്ലെന്നും എങ്കിലും പ്രതിഷേധവും പ്രതിരോധവും തുടരുമെന്നും അദ്ദേഹം ​പറഞ്ഞു. ലക്ഷദ്വീപിലെ എൻ.സി.പി നേതാക്കളായ ആറ്റക്കോയ, ഷർഷാദ്​ എന്നിവരും വാർത്തസമ്മേളനത്തിൽ പ​ങ്കെടുത്തു.