ആവേശമായി നിറയൗവനം

കൊച്ചി: ഇടക്കിടെ കോരിച്ചൊരിഞ്ഞ മഴ​​യിലും ആവേശം ചോരാതെ​ നിറയൗവനം ഒത്തുചേർന്നപ്പോൾ അത്​ ചരിത്രത്തിന്‍റെ പുനരാവർത്തനമായി. രണ്ടുദിവസമായി എറണാകുളത്ത്​ നടന്ന സോളിഡാരിറ്റി സംസ്ഥാന സമ്മേളനം, പുതുകാല വെല്ലുവിളികളെ എല്ലുറപ്പോടെ നേരിടാൻ ആഗ്രഹിക്കുന്ന യുവജന പ്രസ്ഥാനത്തിന് ഏത് പ്രതികൂല കാലാവസ്ഥയിലും സ്തംഭിച്ച് നിൽക്കാനാവില്ലെന്ന്​ ഉറക്കെ പ്രഖ്യാപിക്കാൻ കഴിഞ്ഞു. കാറ്റും കാർമേഘവും നിറഞ്ഞ കാലത്ത്, ഭരണകൂടവും അതിന്റെ ഉപകരണങ്ങളും വംശീയഹത്യക്കുതന്നെ കോപ്പുകൂട്ടുന്ന സന്ദർഭത്തിൽ പ്രത്യേകിച്ചും. ​ സമ്മേളനം നടക്കുമോ എന്നുപോലും സംശയിച്ച സന്ദർഭത്തിൽ, ഇടിയും മിന്നലും ആലിപ്പഴ വർഷവും അനുഭവിച്ച്​ ആസ്വദിച്ച പാലക്കാട്​ നടന്ന ആദ്യ സംസ്ഥാന സമ്മേളനത്തിന്‍റെ ഓർമയിൽ ഇതും ഒരവസരമായാണ്​ സോളിഡാരിറ്റി പ്രവർത്തകർ കണ്ടത്​. പാലക്കാട്ടെ സമ്മേളനത്തിൽ പ​ങ്കെടുക്കാൻ കഴിയാതിരുന്നവർക്ക്​ ഇതൊരു ആഗ്രഹവുമായിരുന്നുവെന്നു വേണം പറയാൻ. മാറിമാറി വന്ന വേനലും മഴയും പ്രതികൂല കാലാവസ്ഥയെ സമ്മേളനത്തിന്‍റെ സുന്ദരതാളമായി മാറ്റിയെടുക്കാൻ പ്രവർത്തകർക്ക്​ കഴിഞ്ഞു. രണ്ടു ദിവസത്തെ വിവിധ സെഷനുകളിലായി നിശ്​ചയിച്ച എല്ലാ പരിപാടികളും യഥാസമയം തന്നെ പൂർത്തിയാക്കാനായി. സമ്മേളനം വിജയകരമാക്കാൻ സംസ്ഥാനത്തിന്‍റെ വിവിധ പ്രദേശങ്ങളിൽ നിന്നെത്തിയ പ്രവർത്തകർ കാണിച്ച ഈ ആവേശവും ആത്മവിശ്വാസവും ഇച്ഛാശക്തിയും രാജ്യത്ത്​ അരക്ഷിതാവസ്ഥ നേരിടുന്ന മുഴുവൻ ജനവിഭാഗത്തിനും നൽകുന്ന പ്രതീക്ഷ വളരെയേറെയാണ്​. സമ്മേളനത്തിന്‍റെ രണ്ടാം ദിനം രാവിലെ പഠന സെഷനുകളാണ്​ നടന്നത്​. സോളിഡാരിറ്റി സംസ്ഥാന സെക്രട്ടറി സി.എ. നൗഷാദ്​, ജമാഅത്തെ ഇസ്​ലാമി സംസ്ഥാന ശൂറ അംഗങ്ങളായ ഡോ. ആർ. യൂസഫ്​, സി. ദാവൂദ്​, ടി. മുഹമ്മദ്​ വേളം, ജമാഅത്തെ ഇസ്​ലാമി സംസ്ഥാന സെക്രട്ടറി അബ്​ദുൽ ഹക്കിം നദ്​വി എന്നിവർ വിവിധ വിഷയങ്ങളിൽ ക്ലാസെടുത്തു. പ്രതിനിധി സമ്മേളന സമാപനം ജമാഅത്തെ ഇസ്​ലാമി ഹിന്ദ്​ ശൂറ അംഗം ഡോ. അബ്​ദുസലാം അഹമ്മദ്​ ഉദ്​ഘാടനം ചെയ്തു. സംസ്ഥാന അസി. അമീർ പി. മുജീബ്​റഹ്​മാൻ മുഖ്യപ്രഭാഷണം നടത്തി. സോളിഡാരിറ്റി സംസ്ഥാന പ്രസിഡന്‍റ്​ നഹാസ്​ മാള സമാപന പ്രഭാഷണം നടത്തി.