മണ്ണ് കടത്ത്​ വിവാദം: കെ.എസ്.ടി.പി പരാതി നൽകി

മൂവാറ്റുപുഴ: മണ്ണ് കടത്തൽ വിവാദം കത്തുന്നതിനിടെ പൊലീസിൽ പരാതി നൽകി കെ.എസ്.ടി.പി അധികൃതർ. കക്കടാശ്ശേരി-കാളിയാർ റോഡ് നിർമാണവുമായി ബന്ധപ്പെട്ട് സ്വകാര്യ വ്യക്തികൾ മണ്ണ്​ മറിച്ചുവിറ്റ സംഭവത്തിൽ അന്വേഷണം നടത്തണമെന്ന് ആവശ്യപ്പെട്ടാണ് കെ.എസ്.ടി.പി പൊലീസിനു കത്ത് നൽകിയത്. റോഡിനു വീതി കൂട്ടി നിർമിക്കാൻ വേണ്ടി സ്വകാര്യ വ്യക്തികൾ വിട്ടുനൽകിയ ഭൂമിയിൽനിന്നുള്ള മണ്ണ്​ ഒരു സംഘമാളുകൾ മറിച്ചുവിറ്റത് വിവാദമായതിനു പിന്നാലെയാണ് കെ.എസ്.ടി.പിയുടെ പരാതി. സംഭവത്തിൽ പ്രതിഷേധം ഉയർന്നതിനെ തുടർന്ന് പോത്താനിക്കാട് പഞ്ചായത്ത് പ്രസിഡന്‍റ്​ നൽകിയ പരാതിയുടെ അടിസ്ഥാനത്തിൽ മണ്ണെടുത്ത് കടത്താൻ ഉപയോഗിച്ച് മണ്ണുമാന്തി യന്ത്രം കസ്റ്റഡിയിൽ എടുത്തിരുന്നു. ഇതിന്റെ തുടർച്ചയായാണ് കെ.എസ്.ടി.പി അസി. എൻജിനീയർ പരാതി നൽകിയത്. സ്വകാര്യ വ്യക്തികൾ നൽകിയ ഭൂമിയിൽനിന്നു മണ്ണ് കടത്താൻ ആർക്കും അനുവാദം നൽകിയിട്ടില്ലെന്ന്​ കെ.എസ്.ടി.പി കത്തിൽ വ്യക്തമാക്കിയിട്ടുണ്ട്.