മൂന്നുവർഷം, രണ്ട്​ പ്രളയം; ഒലിപ്പുഴ സാജിറക്ക്​ തിരിച്ചുനൽകിയത്​ രണ്ടര പവൻ

തുവ്വൂർ: മൂന്നുവർഷം, ഇതിനിടെ കടന്നുപോയത്​ രണ്ടുപ്രളയം... എന്നിട്ടും ഒലിപ്പുഴ സാജിറക്ക്​ തിരിച്ചുനൽകിയത്​ രണ്ടര പവൻ സ്വർണമാല. മാതോത്തിലെ പുക്കുന്നൻ അഹമ്മദ് നിസാറി​െൻറ ഭാര്യ സാജിറക്കാണ്​ ഒലിപ്പുഴ ഒരു കുത്തൊഴുക്കിനും വിട്ടുകൊടുക്കാതെ മാല തിരികെ നൽകിയത്​.

ശനിയാഴ്ച രാവിലെ കുളിക്കാനെത്തിയ മാതോത്തിലെ പരപ്പനിയിൽ വേലായുധനാണ് മാല ലഭിച്ചത്. വേലായുധൻ വിവരം നാട്ടുകാരെ അറിയിച്ചതിനെ തുടർന്നാണ് ഉടമസ്ഥയെ കണ്ടെത്താനായത്. ഒലിപ്പുഴയിൽ കുളിക്കുന്നതിനിടെയാണ് മൂന്നുവർഷം മുമ്പ്​ ആഭരണം നഷ്​ടപ്പെട്ടത്.

അന്ന് നാട്ടുകാരുടെ നേതൃത്വത്തിൽ തിരച്ചിൽ നടത്തിയെങ്കിലും കണ്ടെത്താനായില്ല. നഷ്​ടപ്പെട്ട് രണ്ട് ദിവസത്തിനകം പ്രളയം കാരണം പിന്നീട് പരിശോധിക്കാനേ സാധിച്ചില്ല. മറ്റൊരു പ്രളയംകൂടി കടന്നുപോയെങ്കിലും സ്വർണാഭരണം തിരികെ കിട്ടിയ സന്തോഷത്തിലാണ് സാജിറയും കുടുംബവും.