കാറിടിച്ച് ബൈക്ക് യാത്രികൻ മരിച്ചു; അപകടമുണ്ടാക്കിയ വാഹനം നിർത്താതെ പോയി

മാരാരിക്കുളം: ദേശീയ പാതയിൽ കൊമ്മാടി ശുദ്ധജല സംഭരണിക്ക് മുന്നിലുണ്ടായ വാഹനാപകടത്തിൽ ബൈക്ക് യാത്രികൻ മരിച്ചു. വളവനാട് കിഴക്ക് ദാറുൽ സലാമിൽ എം.ജേക്കബ് (63) ആണ് മരിച്ചത്. ഇടിച്ച കാർ നിർത്താതെ പോയി.

ശനിയാഴ്ച വൈകുന്നേരം ആയിരുന്നു അപകടം. വീടിന് സമീപം പലചരക്ക് കട നടത്തുന്ന ജേക്കബ് ആലപ്പുഴയിൽ നിന്ന് സാധനങ്ങൾ വാങ്ങി മടങ്ങുമ്പോഴായിരുന്നു അപകടം. തലക്ക് സാരമായി പരിക്കേറ്റ് അപകടസ്ഥലത്ത് മരണം സംഭവിച്ചു. തുടർന്ന് സമീപത്തെ സ്വകാര്യ ആശുപത്രിയിലും പിന്നീട് ആലപ്പുഴ മെഡിക്കൽ കോളജിലേക്കും മാറ്റി.സമീപവാസികളിൽ നിന്നു ലഭിച്ചു വിവരത്തിൻ്റെ അടിസ്ഥാനത്തിൽ കാറിനായി പൊലീസ് അന്വേഷണം തുടങ്ങി. ഭാര്യ: ഷേർളി. മക്കൾ: ജിത്തു, അഖിൽ.