കോവിഡ്​ രോഗിക്ക്​ കൈത്താങ്ങായി മൈമൂനത്ത്​

ആറാട്ടുപുഴ: കോവിഡ് രോഗിയായ വീട്ടമ്മക്ക്​ തുണയായി ആംബുലൻസിൽ സഞ്ചരിച്ച് പഞ്ചായത്തംഗം. ആറാട്ടുപുഴ പഞ്ചായത്ത്​ 17ാം വാർഡ് മെംബർ മൈമൂനത്ത് ഫഹദാണ് മാതൃകയായത്. കോവിഡ് രോഗിയായ ഭർതൃമാതാവിനെ പരിചരിക്കാൻ കോവിഡ് രോഗിയായ മരുമകൾക്ക് ആലപ്പുഴ മെഡിക്കൽ കോളജിൽ പോകേണ്ട സാഹചര്യത്തിലാണ്​ മൈമൂനത്തി​െൻറ ഇടപെടൽ.

അർത്തുങ്കൽ സി.എഫ്​.എൽ.ടി.സി.യിൽ കഴിഞ്ഞ 63കാരിയായ ഭർതൃമാതാവിന് ശ്വാസതടസ്സം നേരിട്ടതോടെ​ രാത്രിയിൽ വണ്ടാനം മെഡിക്കൽ കോളജ് ആശുപത്രിയിലേക്ക് അടിയന്തരമായി മാറ്റി​.

പരിചരിക്കാൻ മറ്റാരും ഇല്ലാത്തതിനാൽ കോവിഡ് ബാധിതയായി വീട്ടിൽകഴിയുന്ന മരുമകളെ വണ്ടാനത്തേക്ക് കൊണ്ടുപോകേണ്ട സാഹചര്യമുണ്ടായി. വിവരം അറിഞ്ഞ്​ രോഗിക്ക് പോകാനായി മൈമൂനത്ത് ആംബുലൻസ് ഏർപ്പാടാക്കി. പിന്നാലെ ത​െൻറ ചെറിയ രണ്ടുമക്കളെയും ഉമ്മയുടെ അടുത്താക്കിയശേഷം രോഗിയുടെ വീട്ടിലെത്തി. അപ്പോഴേക്കും സമയം രാത്രി 12 കഴിഞ്ഞിരുന്നു. . പി.പി.ഇ. കിറ്റ് ധരിച്ച് ഇവരും ആംബുലൻസിൽ ഒപ്പം കയറി. ആശുപത്രിയിലും വേണ്ട എല്ലാസഹായവും ചെയ്തുനൽകിയശേഷം പുലർച്ചയോടെയാണ് മൈമൂനത്ത് മടങ്ങിയത്.