ചതിയിൽ ചവിട്ടി താഴ്ത്തി; ഓരോ മടവീഴ്​ചയിലും കുട്ടനാട്​ 'പെരുമ്പറയനെ' ഓർക്കുന്നു

കു​ട്ട​നാ​ട്: കു​ട്ട​നാ​ട്ടി​ലെ കൃ​ഷി​യി​ട​ങ്ങ​ളി​ൽ ഇ​പ്പോ​ഴും ജ്വ​ലി​ക്കു​ന്ന ച​തി​യു​ടെ ഒ​രു ച​രി​ത്ര​മു​ണ്ട്. മ​ണ്ണി​ൽ വി​യ​ർ​പ്പും ചോ​ര​യും ന​ൽ​കി​യ 'പെ​രു​മ്പ​റ​യ​ൻ' ഇ​ന്നും ഓ​രോ മ​ട​വീ​ഴു​മ്പോ​ഴും കു​ട്ട​നാ​ടി​െൻറ നൊ​മ്പ​ര ഓ​ർ​മ​യാ​ണ്. പെ​രു​മ്പ​റ​യ​െൻറ ക​ഥ പ​ഴ​യ ത​ല​മു​റ​ക​ളി​ൽ​നി​ന്ന്​ വാ​മൊ​ഴി​യാ​യി കി​ട്ടി​യ​താ​ണ്. ഒ​രു കൈ​യി​ൽ മ​ൺ​ക​ട്ട​യും മ​റു​കൈ​യി​ൽ ക​ട്ട​കു​ത്താ​നു​ള്ള വ​ടി​യു​മേ​ന്തി​യ വി​ഗ്ര​ഹ​മാ​ണ് ച​തി​യു​ടെ ചോ​ര ചീ​ന്തി​യ ക​ഥ മൂ​ന്നാം ത​ല​മു​റ​ക്ക്​ പ​ക​ർ​ന്ന് ന​ൽ​കു​ന്ന​ത്.

മൂ​ന്ന് ത​ല​മു​റ​ക്ക്​ മു​മ്പ്​ കൃ​ഷി മാ​ത്ര​മാ​യി​രു​ന്നു കു​ട്ട​നാ​ട​ൻ ജ​ന​ത​യു​ടെ ഏ​ക ആ​ശ്ര​യം. ശ്രീ​മൂ​ലം കാ​യ​ലു​മാ​യി ചേ​ർ​ന്നു​കി​ട​ന്ന അ​യ്യ​നാ​ട് പാ​ട​ശേ​ഖ​ര​ത്ത് അ​ന്ന് വി​ള​വ് എ​ടു​ക്കാ​ൻ പാ​ക​മാ​കു​മ്പോ​ൾ സ്ഥി​ര​മാ​യി മ​ട​വീ​ഴു​മാ​യി​രു​ന്നു. എ​ത്ര ശ്ര​മി​ച്ചി​ട്ടും ഇ​ത്​ ത​ട​യാ​ൻ ക​ഴി​യാ​തെ വ​ന്ന​തോ​ടെ പ്ര​ശ്​​ന​പ​രി​ഹാ​ര​മാ​യി ഉ​ട​മ​യാ​യ ജ​ന്മി​ക്ക്​ കി​ട്ടി​യ ഉ​പ​ദേ​ശം മ​നു​ഷ്യ​ക്കു​രു​തി​യാ​യി​രു​ന്നു. ജ​ന്മി​യു​ടെ ആ​ളു​ക​ൾ കു​രു​തി​ക്ക്​ ആ​ളെ അ​ന്വേ​ഷി​ച്ചെ​ങ്കി​ലും കി​ട്ടി​യി​ല്ല.

പാ​ട​ശേ​ഖ​ര​ത്ത് പ​ണി​യെ​ടു​ത്തി​രു​ന്ന അ​ടി​യാ​ന്മാ​രു​ടെ മൂ​പ്പ​നാ​യി​രു​ന്ന കൊ​ച്ചി​ട്യാ​തി​യെ​യും ജ​ന്മി വ​ശ​ത്താ​ക്കി. അ​ങ്ങ​നെ​യി​രി​ക്കെ ഒ​രു ദി​വ​സം കോ​ട്ട​യം പു​തു​പ്പ​ള്ളി​യി​ൽ​നി​ന്ന്​ ബ​ന്ധു​വാ​യ പെ​രു​മ്പ​റ​യ​ൻ, കൊ​ച്ചി​ട്യാ​തി​യു​ടെ വീ​ട്ടി​ലെ​ത്തി. ക​ന​ത്ത മ​ഴ​യാ​യി​രു​ന്ന ആ ​ദി​വ​സം വി​ള​ഞ്ഞു​കി​ട​ന്ന അ​യ്യ​നാ​ട് പാ​ട​ശേ​ഖ​രം വേ​ലി​യേ​റ്റ​ത്തി​ൽ വീ​ണ്ടും മ​ട വീ​ണു. അ​ടി​യാ​ന്മാ​ർ മ​ട​ത​ട​യാ​ൻ പാ​ട​ത്തേ​ക്ക് പാ​ഞ്ഞു. ഒ​പ്പം പെ​രു​മ്പ​റ​യ​നു​മു​ണ്ടാ​യി​രു​ന്നു.

മ​ട​യു​ടെ ഒ​ര​റ്റ​ത്ത് കീ​റി​യ തെ​ങ്ങി​ൻ​കു​റ്റി​ക​ൾ അ​ടി​ച്ചു​റ​പ്പി​ച്ചു. ഓ​ല മെ​ട​ഞ്ഞു​ണ്ടാ​ക്കി​യ ചെ​റ്റ കൂ​ട്ടി​ക്കെ​ട്ടി അ​തി​ൽ മ​ൺ​ക​ട്ട​ക​ളും ച​വ​റു​മി​ട്ടു മ​ട​യ​ട​ക്കു​ന്ന പ​ണി. വ​ള്ള​ത്തി​ൽ ഒ​രു കൂ​ട്ട​ർ മ​ൺ​ക​ട്ട​ക​ൾ ഇ​റ​ക്കും. വെ​ള്ള​ത്തി​ൽ നി​ൽ​ക്കു​ന്ന മ​റ്റു​ള്ള​വ​ർ മ​ണ്ണ് ച​വി​ട്ടി ഉ​റ​പ്പി​ക്കും. അ​ന്ന് മ​ണ്ണ് ച​വി​ട്ടി താ​ഴ്ത്തു​ന്ന​വ​രു​ടെ കൂ​ട്ട​ത്തി​ലാ​യി​രു​ന്നു പെ​രു​മ്പ​റ​യ​ൻ. മ​ട പെ​രു​മ്പ​റ​യ​െൻറ നെ​ഞ്ചി​​നൊ​പ്പ​മാ​യ​പ്പോ​ൾ ക​ട്ട​ക​ൾ വാ​രി​യി​ട്ട്​ മൂ​ടാ​ൻ ജ​ന്മി വ​ള്ള​ത്തി​ലു​ള്ള​വ​രോ​ട്​ ആ​ജ്ഞാ​പി​ച്ചു. ച​ളി ച​വി​ട്ടി ഉ​റ​പ്പി​ച്ച​തി​നൊ​പ്പം പെ​രു​മ്പ​റ​യ​നും മ​ണ്ണി​ലു​റ​ച്ചു. പി​ന്നീ​ട് മ​ട ഉ​റ​ച്ച​താ​യാ​ണ് പ​റ​യ​പ്പെ​ടു​ന്ന​ത്.

എം. ​ക​മ​ലാ​സ​ന​ൻ എ​ഴു​തി​യ 'കു​ട്ട​നാ​ടി​െൻറ ച​രി​ത്രം' എ​ന്ന പു​സ്​​ത​ക​ത്തി​ൽ പെ​രു​മ്പ​റ​യ​നെ​പ്പ​റ്റി പ​രാ​മ​ർ​ശ​മു​ണ്ട്. ടി.​കെ. രാ​ജീ​വ് കു​മാ​ർ സം​വി​ധാ​ന​വും തി​ര​ക്ക​ഥ​യു​മെ​ഴു​തി 1999-ൽ ​പു​റ​ത്തി​റ​ങ്ങി​യ 'ക​ണ്ണെ​ഴു​തി പൊ​ട്ടും​തൊ​ട്ട്' എ​ന്ന സി​നി​മ​യി​ൽ പെ​രു​മ്പ​റ​യ​െൻറ ക​ഥാം​ശ​മു​ണ്ട്. സി​നി​മ​യു​ടെ ഏ​റി​യ ഭാ​ഗ​വും കു​ട്ട​നാ​ട്ടി​ലെ കാ​വാ​ല​ത്താ​യി​രു​ന്നു ചി​ത്രീ​ക​രി​ച്ച​ത്.

ച​തി ച​രി​ത്രം വി​ശ്വാ​സം...
പെ​രു​മ്പ​റ​യ​െൻറ കു​രു​തി​ക്കു​ശേ​ഷം ജ​ന്മി​ക്കു​ടും​ബ​ത്തി​ൽ സ്വ​സ്ഥ​ത​യു​ണ്ടാ​യി​ല്ല. അ​നി​ഷ്​​ട​സം​ഭ​വ​ങ്ങ​ൾ പ​ല​തു​ണ്ടാ​യ​തോ​ടെ പ​രി​ഹാ​ര​മാ​യി അ​വ​ർ​ത​ന്നെ പെ​രു​മ്പ​റ​യ​നെ ആ​വാ​ഹി​ച്ചു പ്ര​തി​മ​യു​ണ്ടാ​ക്കി​യെ​ന്നാ​ണ്​ വി​ശ്വാ​സം. മൂ​ന്ന് ത​ല​മു​റ​ക​ൾ​ക്ക് ശേ​ഷം ഇ​ന്നും ക​രി​ങ്ക​ലി​ൽ കൊ​ത്തി​യെ​ടു​ത്ത പെ​രു​മ്പ​റ​യ​െൻറ പ്ര​തി​മ കു​ട്ട​നാ​ട്ടി​ലു​ണ്ട്. 200 വ​ർ​ഷം പ​ഴ​ക്കം ക​രു​തു​ന്ന ഒ​രു കൈ​യി​ൽ മ​ൺ​ക​ട്ട​യും മ​റു​കൈ​യി​ൽ വ​ടി​യു​മേ​ന്തി​യ വി​ഗ്ര​ഹം നി​ല​വി​ൽ ച​തു​ർ​ഥ്യാ​ക​രി​യി​ലെ തോ​പ്പി​ൽ​ചി​റ വീ​ടി​നു സ​മീ​പ​മു​ള്ള പാ​ട​വ​ര​മ്പ​ത്താ​ണ്. പെ​രു​മ്പ​റ​യ​െൻറ കു​ടും​ബ​ത്തി​ൽ​പെ​ട്ട​വ​രാ​ണ് ഇ​വി​ടെ താ​മ​സി​ക്കു​ന്ന​ത്. കൃ​ഷി​യി​റ​ക്കു​മ്പോ​ഴും പ്ര​ധാ​ന​പ്പെ​ട്ട ച​ട​ങ്ങു​ക​ൾ​ക്ക് തു​ട​ക്കം കു​റി​ക്കു​മ്പോ​ഴും വി​ശ്വാ​സി​ക​ൾ പെ​രു​മ്പ​റ​യ​ന് മു​ന്നി​ൽ വെ​ള്ളം​കു​ടി വ​ഴി​പാ​ട് ന​ട​ത്താ​റു​ണ്ട്. പെ​രു​മ്പ​റ​യ​നെ മ​ര്യാ​ദ​യോ​ടെ ആ​രാ​ധി​ക്കാ​നൊ​രി​ട​മൊ​രു​ക്കാ​ൻ പ​ട്ടി​ക​ജാ​തി വി​ക​സ​ന മ​ന്ത്രി​യെ കാ​ണാ​നൊ​രു​ങ്ങു​ക​യാ​ണ്​​ ഇ​ക്കൂ​ട്ട​ർ.