നെല്ലിനും മഴയ്ക്കുമിടയിൽ കുട്ടനാടൻ കർഷകരുടെ ജീവിതം; നെല്ലെടുക്കാൻ ആരുമില്ല, ചോദിക്കാനും
text_fields
കുട്ടനാട് നീലംപേരൂര്‍ കൃഷിഭവന്‍റെ പരിധിയില്‍ കിളിയന്‍കാവ് വടക്ക് പാടശേഖരത്തില്‍ കൂട്ടിയിട്ട നെല്ലിനരികെ കർഷകൻ
ആലപ്പുഴ: കൊയ്ത് കൂട്ടിയിട്ട നെല്ല് ഒരു വശത്ത്. എല്ലാ കണക്കുകൂട്ടലും തെറ്റിച്ച് പെയ്യുന്ന മഴ മറുവശത്ത്. രണ്ടിനുമിടയിലിരുന്ന് നെടുവീർപ്പിടുകയാണ് കുട്ടനാട്ടിലെ നെൽ കർഷകർ. കൊയ്ത്ത് കഴിഞ്ഞ് ദിവസങ്ങളായിട്ടും നെല്ല് എടുക്കാൻ മില്ലുകാർ തയാറാകാത്തതോടെ ആശങ്കയിലാണ് കർഷകർ. കുട്ടനാട് നീലംപേരൂര്‍ കൃഷിഭവന്‍റെ പരിധിയില്‍ കിളിയന്‍കാവ് വടക്ക് പാടശേഖരത്തിലെ കര്‍ഷകരാണ് പ്രതിസന്ധിയിലായത്. ചെറുകിട -പാട്ട കര്‍ഷകരുള്‍പ്പെടെ 300 ഏക്കറോളം വരുന്ന പാടശേഖരത്തില്‍ 165 ഓളം കര്‍ഷകരാണ് കൃഷി ചെയ്യുന്നത്. കഴിഞ്ഞ 15 മുതൽ കൊയ്ത്ത് ആരംഭിച്ചു. പാടശേഖരത്തിന്‍റെ പകുതിയോളം കൊയ്ത് നെല്ല് കൂട്ടിയിട്ടെങ്കിലും നെല്ലെടുക്കാന്‍ മില്ലുകാര്‍ തയാറായിട്ടില്ല. കഴിഞ്ഞ ദിവസങ്ങളില്‍ പെയ്ത മഴയില്‍ പാടത്ത് കൂട്ടിയിട്ട നെല്ല് മുഴുവന്‍ വെള്ളത്തിലുമായി.
കിട്ടുന്ന വെയില്‍ പാഴാക്കാതെ ജോലിക്കാരെ നിര്‍ത്തി ഓരോ ദിവസവും നെല്ല് ഉണക്കി കൂട്ടുകയാണ് കർഷകരിപ്പോൾ. അതിനുതന്നെ ഒരാള്‍ക്ക് 1500 രൂപ കൂലി കൊടുക്കണം. ഒരേക്കറിലെ നെല്ല് ഉണക്കാന്‍ നാല് പേരെങ്കിലും വേണം. ഒരേക്കര്‍ നിലം വിതച്ച് കൊയ്യാന്‍ പാകമാക്കിയപ്പോള്‍ 30,000 രൂപയോളം ചെലവ് വന്നു. കൂടാതെ കൊയ്യാന്‍ മണിക്കൂറിന് 2000 രൂപ വേറെയും. നിലത്ത് വെള്ളക്കെട്ടായതിനാല്‍ ഒരേക്കര്‍ കൊയ്യാന്‍ മൂന്ന് മണിക്കൂറോളം വേണ്ടിവരും. ഇത്രയൊക്കെ ചെലവാക്കി കൊയ്തെടുത്ത നെല്ലെടുക്കാന്‍ മില്ലുകാര്‍ തയാറാകാത്തത് കര്‍ഷകരോട് കാണിക്കുന്ന അവഗണനയാണ്.
ദിവസങ്ങള്‍ കഴിഞ്ഞിട്ടും കൃഷിവകുപ്പ് ഉദ്യോഗസ്ഥര്‍ പോലും തിരിഞ്ഞ് നോക്കിയിട്ടില്ലെന്നാണ് കര്‍ഷകര്‍ പറയുന്നത്. നിലവില്‍ 100ഓളം ലോഡ് നെല്ല് പാടശേഖരത്ത് വിവിധയിടങ്ങളിലായി കെട്ടികിടക്കുന്നുണ്ട്. നെല്ലിന്‍റെ നനവ് ആരോപിച്ച് തൂക്കത്തില്‍ കിഴിവ് വരുത്താനുള്ള നീക്കമാണ് മില്ലുകാര്‍ നടത്തുന്നതെന്നാണ് കര്‍ഷകരുടെ ആരോപണം.
നെല്ലുണക്കിയെടുക്കാൻ കൂടുതൽ പണച്ചെലവുള്ളതിനാൽ നനവോടെ നെല്ല് തൂക്കാൻ കർഷകർ നിർബന്ധിതരാകുന്നതും മില്ലുകാർ അവസരമാക്കുന്നതായും ആരോപണമുണ്ട്. കൃഷിവകുപ്പ് ഉദ്യോഗസ്ഥരും ഇതിന് കൂട്ട് നില്‍ക്കുന്നതായ ആക്ഷേപവും ശക്തമാണ്.
അടുത്തദിവസം മുതൽ നെല്ലെടുപ്പ് ആരംഭിക്കും -പാഡി ഓഫിസർ
കിളിയൻകാവ് വടക്ക് പാടശേഖരത്തിലെ നെല്ലെടുക്കാനുള്ള കരാർ പവിഴം മില്ലുകാർക്കായിരുന്നു. നാല് കിലോ കിഴിവാണ് മില്ലുകാർ ആവശ്യപ്പെട്ടത്. എന്നാൽ, കർഷകർ അതിന് വഴങ്ങാതിരുന്നതിനാൽ മൂന്നു കിലോ കിഴിവിൽ നെല്ലെടുക്കാമെന്ന് മില്ലുകാർ പറഞ്ഞു. എന്നാൽ, രണ്ട് കിലോയിൽ കൂടുതൽ നൽകാൻ കർഷകർ തയാറായില്ലെന്നാണ് പാഡി ഓഫിസർ പ്രമോദ് പറയുന്നത്.
തുടർന്ന് സൂര്യ മില്ലുകാർക്ക് നെല്ലെടുക്കാനുള്ള അനുമതി നൽകി. അടുത്തദിവസം തന്നെ നെല്ലെടുക്കാനുള്ള നടപടികളാകുമെന്നാണ് പ്രമോദ് പറയുന്നത്. എന്നാൽ കഴിഞ്ഞ വെള്ളിയാഴ്ച നടന്ന കർഷകരുടെ പൊതുയോഗത്തിൽ അഞ്ച് കിലോ വരെ കിഴിവാണെങ്കിലും നെല്ല് കൊടുക്കാൻ തീരുമാനമെടുത്തതാണെന്നാണ് കർഷകർ പറയുന്നത്. ഈ വിവരം പാഡി ഓഫിസറെ അറിയിച്ചതുമാണ്. വേണ്ട നടപടികൾ സ്വീകരിക്കുകയോ പാടശേഖരം സന്ദർശിക്കാനോ പാഡി ഓഫിസർ തയാറായില്ലെന്നാണ് കർഷകർ ആരോപിക്കുന്നത്.