‘കൊള്ളിമീൻ’ പോലെ ചുണ്ടനുകൾ...

ആലപ്പുഴ: മുൻവർഷങ്ങളെ അപേക്ഷിച്ച്​ ട്രയൽപ്പോരിൽ മികച്ചസമയം കുറിച്ച്​​ കൊള്ളിമീൻ വേഗത്തിലാണ്​ മിക്ക ചുണ്ടൻവള്ളങ്ങളും ജലവേദിയായ പുന്നമടയിലെ ട്രാക്കിലേക്ക്​ ഇടിച്ചുകയറിയത്​. ചാമ്പ്യൻസ്​ ബോട്ട്​ ലീഗിൽ യോഗ്യത നേടാൻ തീപാറും പോരാട്ടം പുറത്തെടുക്കും. ഇത്​ നെഹ്​റു​ട്രോഫി മത്സരത്തിന്​ കൂടുതൽ വീറും വാശിയുമുണ്ടാക്കും. ​ട്രാക്ക്​ എൻട്രിയിൽ പ്രമുഖ വള്ളങ്ങളും ക്ലബുകളും കുറിച്ച സമയം നോക്കുമ്പോൾ മില്ലിസെക്കൻഡ്​ വ്യത്യാസത്തിൽ മാത്രമേ ഫൈനലിൽ വിജയിയെ കണ്ടെത്താൻ കഴിയൂ. മികച്ച സ്റ്റാർട്ടിങ്ങും സമയത്തിന്‍റെ ആനുകൂല്യവും സഹായകരമാകും.

വീയപുരം, തലവടി, മേൽപാടം, നിരണം, നടുഭാഗം, അരോമ, ആർപ്പൂക്കര, പുണ്യാളൻ നിരണം അടക്കമുള്ള വള്ളങ്ങൾ തുഴയുന്ന ക്ലബുകളെല്ലാം മികച്ച ഫോമിലാണ്​. അത്​ ഓളപ്പരപ്പിലെ സ്​പീഡായി മാറും. കൊള്ളിമീന്‍ പോലെ, ചാട്ടുളി പോലെ, കരിനാഗം പോലെ തുടങ്ങിയ വേഗത്തിന്റെ വാക്പ്രയോഗങ്ങള്‍ ആരാധകരുടെ മനസ്സിൽ നിറക്കുന്നത്​​ വള്ളത്തിന്റെ താളവും വേഗവുമെല്ലാമാണ്​.

സമ്മാനത്തുക ഇരട്ടി; ഒന്നാംസ്ഥാനക്കാർക്ക്​ 25 ലക്ഷം

പോരിനിറങ്ങുന്ന ചുണ്ടൻവള്ളങ്ങൾക്ക്​ സമ്മാനത്തുക ഇരട്ടിയാക്കിയതിന്‍റെ ഉണർവ് വള്ളസമിതിക്കും ക്ലബുകൾക്കമുണ്ട്​. ഇതിന്‍റെ പ്രയോജനം തുഴച്ചിലുകാർക്കും​ലഭിക്കും. ഇത്തവണ ഒന്നാമ​ത്​ എത്തുന്ന ചുണ്ടന്​​ 25 ലക്ഷം രൂപയാണ്​ ലഭിക്കുക. ഇതിനൊപ്പം 8.25 ലക്ഷം ബോണസും കിട്ടും. രണ്ടാംസ്ഥാനത്തിന്​ 20 ലക്ഷവും മൂന്നാംസ്ഥാനത്തിന്​ 15 ലക്ഷവും നാലാംസ്ഥാനത്തിന്​ 10 ലക്ഷവുമാണ്​ സമ്മാനം. ഇവർക്കെല്ലാം 8.25 ലക്ഷംരൂപ ബോണസുമുണ്ടാകും.

അഞ്ച്​ മുതൽ ബാക്കിവരുന്ന സ്ഥാനങ്ങൾ സമാനരീതിയിൽ ബോണസ്​ മാത്രമാണ് ലഭിക്കുക. കഴിഞ്ഞ വർഷത്തേക്കാൾ നാലിരട്ടി തുകയാണ്​ വർധിച്ചത്​. മാസ്​ഡ്രില്ലിൽ മികവ്​ പുലർത്തുന്ന വള്ളത്തിന്​ ഒന്നാംസമ്മാനമായി 25,000 രൂപയും രണ്ടാംസ്ഥാനമായി 10,000 രൂപയും ലഭിക്കും. നെഹ്​റു​ട്രോഫിയിൽ ഇത്​ ആദ്യമാണ്​.

പുന്നമട കളറാകും

ചരിത്രത്തിലാദ്യമായി നെഹ്​റുട്രോഫി വള്ളംകളി നടത്തുന്നത്​ ഇവന്‍റ്​ മാ​നേജ്​മെന്‍റ്​ കമ്പനിയാണ്​. നെഹ്​റുട്രോഫി പവലിയൻ, സ്​റ്റേജ്​, പന്തൽ, ടിക്കറ്റ്​ കൗണ്ടർ, എൽ.ഇ.ഡി വാൾ, ശബ്​ദസംവിധാനം, അലങ്കാരങ്ങൾ എന്നിവയെല്ലാം അന്താരാഷ്ട്ര നിലവാരത്തിലുള്ള മത്സരത്തിന്​ ഉപയോഗിക്കുംവിധമാണ്​ സജ്ജമാക്കിയത്​.

ഇതിനായി പ്രത്യേക കളർകോഡുമുണ്ട്​. ഓറഞ്ചും വയലറ്റും പർപ്പിളും ചേർന്ന കളറാണ്​ ഉപയോഗിക്കുന്നത്​. പ്രവേശന കവാടം മുതൽ ടിക്കറ്റ്​ വരെ എല്ലാ കാര്യത്തിലും ഇത്​ പ്രകടനമാകും. ജ​ലവേദിയിൽ അപകടരഹിതമായ സുരക്ഷയൊരുക്കും.

വള്ളംകളിയുടെ ‘തലവര’ മാറ്റിയ ലീഗ്​

കടബാധ്യതയിലും കഷ്ടപ്പാടിലും കുപ്പുകുത്തിയ വള്ളംകളി മേഖലയുടെ സംരക്ഷണത്തിനും തലവര മാറ്റാനും വിനോദസഞ്ചാര വകുപ്പി​ന്‍റെ നേതൃത്വത്തിൽ 2019ലാണ്​ ചാമ്പ്യൻസ്​ ബോട്ട്​ ലീഗിന്‍റെ തുടക്കം.

തുഴയെറിഞ്ഞ്​ പണം വാരമെന്ന ചിന്തയും ഉട​ലെടുത്തു. ഇതിന്​ പിന്നാലെയാണ്​ പരമ്പരാഗത വള്ളംകളിയുടെ രൂപവും ഭാവവും മാറിയത്​. തോർത്തും മുണ്ടു​മെല്ലാം മാറ്റി, തുഴച്ചിലുകാരുടെ മുഖ്യവേഷം ജഴ്​സിയായി. പ്രഫഷനലിസത്തിലേക്കുള്ള ആദ്യചുവടുവെപ്പ്​ കൂടിയായിരുന്നു ഇത്​. ഓളപ്പരപ്പിലെ ഒളിമ്പിക്സിൽ മാറ്റുരക്കാൻ മികച്ച പരിശീലകരുടെ നേതൃത്വത്തിൽ തുഴച്ചിലുകാർക്ക്​ ശാസ്ത്രീയ പരിശീലനവും നൽകി. ഇതിനൊപ്പം ഓണക്കാലത്തെ പ്രാദേശിക വള്ളംകളികൂടി എത്തിയതോടെ ക്ലബുകൾ തമ്മിലെ മത്സരത്തിന്​ വീറും വാശിയും കൂടി.

സ്​റ്റാർട്ടിങ്​ പോയന്‍റിൽ ഇലക്​ട്രിക്ക്​ ഗൺ

മത്സരം ആരംഭിക്കുന്നതിന്​ മുമ്പ്​ വെടിയൊച്ച ശബ്​ദം കേൾക്കാൻ ഇത്തവണ ഉപയോഗിക്കുന്നത്​ ഇലക്​ട്രിക്ക്​ ഗൺ ആണ്​. പുതിയ സാ​​ങ്കേതിക വിദ്യയുടെ ശബ്​ദസംവിധാനം കോർത്തിണക്കിയാണിത്. 1,150 മീറ്ററാണ്​ ട്രാക്കിന്‍റെ നീളം. നാല്​ ട്രാക്കുകളായി 71 വള്ളങ്ങൾ മത്സരിക്കും. ട്രാക്ക്​ വേർതിരിക്കാൻ ഇടിക്കിടെ കൊടിനാട്ടിയ കുറ്റികളുണ്ടാകും. ഫിനിഷിങ്​ പോയന്‍റിൽ വള്ളങ്ങളുടെ സമയം കൃത്യമായി രേഖപ്പെടുത്താൻ വൈറ്റ്​സോണും റെഡ്​സോണും ക്രമീകരിച്ചിട്ടുണ്ട്​. നഗ്നനേത്രങ്ങ​ളേക്കാൾ കൃത്യത, ഫിനിഷിങ്​ സമയം എന്നിവ കാണികൾക്ക്​ തിരിച്ചറിയാൻ വലിയ എൽ.ഇ.ഡി സിഡ്പ്ലേ വാളും​ ക്രമീകരിച്ചു​. ഇതോടെ, ജലോത്സവപ്രേമികളുടെ കണ്ണും കാതും കൂർപ്പിച്ചുള്ള​ കാത്തിരിപ്പിന്​ വിരാമമായി.

നെഹ്​റുട്രോഫി വള്ളംകളി പ്രഫഷനൽ രീതിയിലേക്ക്​ മാറിയതിന്‍റെ ഭാഗമായി തയാറാക്കിയ ​ഓറഞ്ച്, വയലറ്റ്, പൾപ്പിൾ കള​ർകോഡിലെ തൊപ്പിയും ജഴ്​സിയും