ഇടക്കൊച്ചി പാലത്തിൽ ബൈക്ക് യാത്രികന്റെ കഴുത്തിൽ ടങ്കീസ് കുരുങ്ങി

അരൂർ: അരൂർ-ഇടക്കൊച്ചി പാലത്തിൽ ബൈക്ക് യാത്രികന് കഴുത്തിൽ ചൂണ്ടയുടെ ടങ്കീസ് കുരുങ്ങി മുറിവേറ്റു. അരൂർ കോന്നോത്ത് ബോണിഫസിന്റെ (49) കഴുത്തിലാണ് ടങ്കീസ് കുരുങ്ങിയത്. പെട്ടെന്ന് ബൈക്ക് നിയന്ത്രിച്ചതിനാൽ അപകടം ഒഴിവായി. കൂടെ മകളും ഉണ്ടായിരുന്നു. കഴിഞ്ഞദിവസം പകൽ മൂന്നോടെയായിരുന്നു സംഭവം. ഈ സമയം പാലത്തിന്റെ ഇരുഭാഗങ്ങളിലുമായി ഇരുപതിലേറെ പേർ ചൂണ്ടയിടാൻ ഉണ്ടായിരുന്നെന്ന് ബോണിഫസ് പറഞ്ഞു.

ഇതിലേറെയും അതിഥി തൊഴിലാളികളായിരുന്നു. ടങ്കീസ് ബൈക്ക് യാത്രികന്റെ കഴുത്തിൽ കുരുങ്ങിയെന്ന് മനസ്സിലായതോടെ ചൂണ്ടയിട്ട് കൊണ്ടിരുന്നവരെല്ലാം സ്ഥലം വിട്ടു. ബോണിഫസ് അരൂർ ഗവ.ആശുപത്രിയിൽ ചികിത്സതേടി. അരൂർ പൊലീസിൽ പരാതി നൽകി.