2561 പേര്‍ക്ക് കോവിഡ്; രോഗമുക്തി 822

തുടർച്ചയായ മൂന്നാംദിവസവും ടി.പി.ആർ പുറത്തുവിട്ടില്ല ആലപ്പുഴ: ജില്ലയില്‍ 2561 പേര്‍ക്കുകൂടി കോവിഡ് സ്ഥിരീകരിച്ചു. 2460 പേര്‍ക്ക് സമ്പര്‍ക്കത്തിലൂടെയാണ് രോഗം. 27 ആരോഗ്യപ്രവര്‍ത്തകരും രോഗബാധിതരായി. 74 പേരുടെ സമ്പര്‍ക്ക ഉറവിടം വ്യക്തമല്ല. 822 പേര്‍ രോഗമുക്തരായി. നിലവില്‍ 10,982 പേര്‍ ചികിത്സയിലുണ്ട്​. രണ്ടുദിവസത്തെ ഇടവേളക്കുശേഷമാണ്​ ജില്ലയിലെ കോവിഡ്​ കണക്ക്​ ആരോഗ്യവകുപ്പ്​ പുറത്തുവിടുന്നത്​. അതിനിടെ, യഥാർഥ കണക്ക്​ മറച്ചുവെക്കുകയാണെന്ന ആക്ഷേപവും ഉണ്ട്​. ഞായറാഴ്ച ജില്ലയിൽ 1564 പേർക്ക്​ രോഗം ബാധിച്ചെന്നായിരുന്നു ഔദ്യോഗിക കണക്ക്​. ആരോഗ്യവകുപ്പിന്‍റെ വെബ്​സൈറ്റിൽ 2168 എന്നാണ്​ രേഖപ്പെടുത്തിയിരിക്കുന്നത്​. സെർവർ തകരാറായിരുന്നതിനാലാണ്​ രണ്ടുദിവസം കണക്കുകൾ നൽകാതിരുന്ന​തെന്നാണ്​ അധികൃതരുടെ വിശദീകരണം. രോഗവ്യാപനം ഇരട്ടിയായിട്ടും തുടർച്ചയായ മൂന്നാംദിവസവും ജില്ലയിലെ ടി.പി.ആർ വെളിപ്പെടുത്താൻ ആരോഗ്യവകുപ്പ്​ തയാറായിട്ടില്ല. കാര്യങ്ങൾ കൈവിട്ടുപോയോ എന്ന ആശങ്കയും നിലനിൽക്കുന്നുണ്ട്​. കഴിഞ്ഞദിവസങ്ങളിൽ രാത്രി ഏറെ വൈകി സംസ്ഥാനതലത്തിലെ റിപ്പോർട്ട്​ മാത്രമാണ്​ നൽകിയിരുന്നത്​. താലൂക്കുകളിൽ സംയുക്ത സ്‌ക്വാഡ് ആലപ്പുഴ: കോവിഡ് പ്രതിരോധ മാര്‍ഗനിര്‍ദേശങ്ങളുടെ ലംഘനം പരിശോധിക്കാനും തുടര്‍ നടപടി സ്വീകരിക്കാനും ജില്ലയിലെ ആറു താലൂക്കിലും സംയുക്ത സ്‌ക്വാഡുകള്‍ രൂപവത്​കരിച്ച് പരിശോധന നടത്താൻ കലക്ടര്‍ എ. അലക്‌സാണ്ടര്‍ ഉത്തരവിട്ടു. തഹസില്‍ദാര്‍മാരുടെ നേതൃത്വത്തിലെ സ്‌ക്വാഡില്‍ റവന്യൂ, പൊലീസ്, തദ്ദേശ സ്ഥാപനങ്ങളിലെ ഉദ്യോഗസ്ഥർ എന്നിവരുണ്ടാകും. മാര്‍ക്കറ്റുകള്‍, വ്യാപാര കേന്ദ്രങ്ങള്‍, സിനിമ തിയറ്ററുകള്‍, ബാറുകള്‍, ബീച്ചുകള്‍, പ്രധാന ടൂറിസം കേന്ദ്രങ്ങള്‍, മറ്റു പൊതുഇടങ്ങള്‍, ബാങ്കുകള്‍, സര്‍ക്കാര്‍-അര്‍ധസര്‍ക്കാര്‍-സ്വകാര്യ സ്ഥാപനങ്ങള്‍ എന്നിവിടങ്ങളില്‍ സ്‌ക്വാഡുകള്‍ പരിശോധന നടത്തും. ആളുകള്‍ കൂട്ടംകൂടുന്നില്ലെന്നും സമൂഹ അകലം, മാസ്‌കിന്റെ ശരിയായ ഉപയോഗം, സ്ഥാപനങ്ങളിലെ ബ്രേക് ദ ചെയിന്‍ ക്രമീകരണങ്ങള്‍ എന്നിവയുമായി ബന്ധപ്പെട്ട നിര്‍ദേശങ്ങള്‍ പാലിക്കപ്പെടുന്നുണ്ടെന്നും ഉറപ്പാക്കാനാണ്​ പരിശോധന. വിവാഹം, മരണാനന്തര ചടങ്ങുകള്‍ തുടങ്ങിയവയില്‍ അനുവദനീയമായതിലും കൂടുതല്‍ പേര്‍ പങ്കെടുക്കുന്നുണ്ടോയെന്നും പരിശോധിക്കും. നിര്‍ദേശങ്ങള്‍ പാലിക്കാത്തവര്‍ക്കെതിരെ നിയമനടപടി സ്വീകരിക്കും. താലൂക്കുതല സ്‌ക്വാഡുകളുടെ പ്രവര്‍ത്തനങ്ങളുടെ മേല്‍നോട്ടച്ചുമതല സബ് കലക്ടർക്കാണ്​.