പ്ലസ് ​ടുവിന്​ 79.46 ശതമാനം വിജയം

* വിജയ ശതമാനത്തിൽ കുറവ്​; 1328 കുട്ടികൾക്ക്​​ എ പ്ലസ്​ * ടെക്നിക്കൽ സ്കൂൾ- 67, ഓപൺ സ്കൂൾ- 45.92, വി.എച്ച്​.എസ്​.ഇ- 76.75 ശതമാനം വിജയം ആലപ്പുഴ: ഹയർ സെക്കൻഡറി പരീക്ഷയിൽ ജില്ലയിൽ 79.46 ശതമാനം വിജയം. 121 കേ​​ന്ദ്രങ്ങളിലായി 22,065 കുട്ടികളാണ്​ പരീക്ഷയെഴുതിയത്​. ഇതിൽ 17,532 പേർ ഉപരിപഠനത്തിന്​ അർഹത നേടി. 1328 പേർ മുഴുവൻ വിഷയത്തിനും എ പ്ലസ്​ നേടി. വിജയ ശതമാനത്തിൽ സംസ്ഥാനത്ത്​ ജില്ലയുടെ സ്ഥാനം പത്താണ്​. ടെക്നിക്കൽ സ്കൂൾ വിഭാഗത്തിൽ 67 ശതമാനമാണ്​ വിജയം. ഇവിടെ പരീക്ഷയെഴുതിയ 79 കുട്ടികളിൽ 53 പേർ വിജയിച്ചു. ഓപൺ സ്കൂൾ വിഭാഗത്തിൽ 45.92 ശതമാനമാണ്​ വിജയം. ഈ വിഭാഗത്തിൽ പരീക്ഷ​യെഴുതിയ 956 പേരിൽ 439 ​പേർ ഉപരിപഠനത്തിന്​ യോഗ്യത നേടി. 54 കുട്ടികൾ മുഴുവൻ വിഷയത്തിനും എ പ്ലസ്​ സ്വന്തമാക്കി. വി.എച്ച്​.എസ്​.ഇയി​ൽ 76.75 ശതമാനമാണ്​ വിജയം. ഇവിടെ പരീക്ഷയെഴുതിയ 1514 കുട്ടികളിൽ 1162 പേർ ഉപരിപഠനത്തിന്​ യോഗ്യത നേടി. മുൻ വർഷത്തേക്കാൾ വിജയ ശതമാനത്തിൽ കുറവുണ്ടായി. കേവിഡ്‌കാലത്തെ നിയന്ത്രണങ്ങൾക്കുശേഷം നടന്ന പരീക്ഷയായതിനാൽ മികച്ച വിജയമാണ്​ പ്രതീക്ഷിച്ചത്​. പ്ലസ് ​ടുവിന്​ 2019ൽ 80.29 ശതമാനവും 2020ൽ 82.46 ശതമാനവും 2021ൽ 84.18 ശതമാനവുമായിരുന്നു വിജയം. തുടർച്ചയായി മൂന്നുവർഷത്തെ കുതിപ്പിന്​ പിന്നാലെയാണ്​ വിജയ ശതമാനത്തിൽ ഇടിവുണ്ടായത്​. ഹയർ സെക്കൻഡറി ഓപൺ വിഭാഗത്തിൽ കഴിഞ്ഞ വർഷത്തെ വിജയ ശതമാനത്തിലും എ പ്ലസ്​ നേടിയവരുടെ എണ്ണത്തിലും വൻ കുറവുണ്ട്​. ഹയർ സെക്കൻഡറിൽ കഴിഞ്ഞ തവണത്തെ 84.18 ശതമാനത്തിൽനിന്ന്​​ 4.72 ശതമാനമാണ്​ കുറഞ്ഞത്​. എ പ്ലസ്​ നേടിയവരുടെ എണ്ണത്തിലും വൻ വ്യത്യാസമുണ്ട്​. 2021ൽ എല്ലാ വിഷയത്തിനും 2,340 പേർ എ പ്ലസ് ​നേടിയപ്പോൾ ഇക്കുറി അത്​ 1328 ആയി ചുരുങ്ങി. ടെക്നിക്കൽ സ്കൂൾ വിഭാഗത്തിൽ വിജയ ശതമാനം ഉയർന്നു. 2021ൽ 62.96 വിജയ ശതമാനത്തിൽനിന്ന്​ 4.04 ശതമാനം വർധനയുണ്ടായി. എന്നാൽ, ഈ വിഭാഗത്തിൽ മുഴുവൻ വിഷയത്തിനും ഒരാൾക്കുപോലും എ പ്ലസ്​ നേടാനായില്ല. ഓപൺ വിഭാഗത്തിൽ കഴിഞ്ഞ തവണത്തെ 50.82 ശതമാനമായിരുന്നു വിജയം. ഇക്കുറി 4.9 ശതമാനം കുറവുണ്ടായി. വി.എച്ച്​.എസ്​.ഇ, ടെക്‌നിക്കൽ സ്കൂൾ വിജയ ശതമാനം കൂടി ആലപ്പുഴ: പ്ലസ്​ ടുവിന്​ വിജയ ശതമാനം കുറഞ്ഞപ്പോൾ വി.എച്ച്​.എസ്​.ഇ, ടെക്നിക്കൽ സ്കൂൾ വിഭാഗത്തിൽ നേരിയ വർധന. വി.എച്ച്​.എസ്​.ഇയിൽ 76.75 ശതമാനമാണ്​ വിജയം. പരീക്ഷയെഴുതിയ 1514 കുട്ടികളിൽ 1162 പേർ ഉപരിപഠനത്തിന്​ അർഹത നേടി. കഴിഞ്ഞവർഷം 74.71 ശതമാനമായിരുന്നു വിജയം. ജില്ലയിൽ വി.എച്ച്​.എസ്​.ഇയിലെ ഒരു സ്കൂളിനുപോലും നൂറുശതമാനം വിജയം നേടാനായില്ല. ടെക്നിക്കൽ സ്കൂൾ വിഭാഗത്തിൽ വിജയ ശതമാനം കഴിഞ്ഞ തവണത്തെ 62.96ൽനിന്ന്‌ 67 ആയി വർധിച്ചു.