ആലപ്പുഴ ബീച്ചിൽ വീണ്ടും 58കാരന്‍റെ ആത്മഹത്യശ്രമം: രക്ഷയൊരുക്കി ടൂറിസം പൊലീസ്​

ആലപ്പുഴ: കൈയിൽ വിഷക്കുപ്പി കരുതി ആലപ്പുഴ ബീച്ചിൽ ആത്മഹത്യശ്രമത്തിന്​ എത്തിയ 58കാരനെ ടൂറിസം പൊലീസ്​ രക്ഷിച്ചു. വ്യാഴാഴ്ച ഉച്ചക്ക്​ 2.45നാണ്​ സംഭവം. കടൽതീരത്തെ കാറ്റാടി മരങ്ങൾക്കിടയിലൂടെ മണിക്കൂറുകളായി ഒരാൾ കൈയിൽ എന്തോ പിടിച്ച്​ നടക്കുന്നത്​ ടൂറിസം പൊലീസിന്‍റെ ശ്രദ്ധയിൽപെട്ടു. ഇയാളുടെ അടുത്തെത്തി ചോദ്യംചെയ്തു. ഇതിനിടെ, കൈയിൽ വിഷക്കുപ്പിയും കണ്ടെത്തി. ഇയാളുടെ ഭാര്യ കുറച്ചുനാൾ മുമ്പ്​ ആത്മഹത്യ ചെയ്തിരുന്നു. മക്കളില്ലാത്ത ഇയാൾ കൂടുതൽ ഒറ്റപ്പെട്ടെന്ന മനോവിഷമത്തിലാണ്​ ആലപ്പുഴ കടലിൽ ചാടി ആത്മഹത്യ ചെയ്യാൻ തീരുമാനിച്ചതെന്ന്​ പൊലീസ്​ പറഞ്ഞു​. ​വിഷം കഴിച്ചശേഷം ആത്മഹത്യചെയ്യാനായിരുന്നു തീരുമാനം. തുടർന്ന്​ പ്രാഥമികബോധവത്​കരണം നൽകി പിന്തിരിപ്പിച്ചു. പിന്നീട്​ കൗൺസലിങ്ങിനായി ആലപ്പുഴ സൗത്ത്​ പൊലീസിന്​ കൈമാറി. ആലപ്പുഴ ടൂറിസം എസ്.ഐ പി. ജയറാം, പൊലീസുകാരായ ബിജു വിൻസെന്‍റ്​, സീന, കോസ്റ്റൽ വാർഡൻ രഞ്ജിത്ത് എന്നിവരടങ്ങുന്ന സംഘമാണ് രക്ഷിച്ചത്. മൂന്നുമാസത്തിനിടെ 11ലധികം ആളുകളാണ്​ ആലപ്പുഴ ബീച്ചിൽ ആത്മഹത്യ ചെയ്യാൻ എത്തിയത്​. ഇവരെ സമയോചിത ഇടപെടലിലൂടെ രക്ഷപ്പെടുത്തുകയായിരുന്നു.