മുൻഗണന റേഷൻ കാർഡ്: അപേക്ഷകൾ 5000; മാർക്കിടൽ തുടങ്ങി

-സെപ്റ്റംബറിനുശേഷം ലഭിച്ചത്​ 1,000 മുതൽ 5,000 വരെ അപേക്ഷ ആലപ്പുഴ: ദേശീയ ഭക്ഷ്യഭദ്രത നിയമപ്രകാരം മുൻഗണന കാർഡുകൾ (മഞ്ഞ, പിങ്ക്) ലഭിക്കാൻ അപേക്ഷ സമർപ്പിച്ചവരുടെ മാർക്കിടൽ താലൂക്ക് സപ്ലൈ ഓഫിസുകളിൽ ആരംഭിച്ചു. അപേക്ഷയോടൊപ്പം മുഴുവൻ രേഖകളും സമർപ്പിച്ചവരുടെ മാർക്കാണ് ആദ്യമിടുന്നത്. രേഖകൾ ഹാജരാക്കാത്തവർ അവ സമർപ്പിക്കുന്ന മുറക്ക്​ മാർക്കിടാനും നടപടിയായി. ഓരോരുത്തരുടെയും ജീവിതസാഹചര്യവും സാമ്പത്തികനിലയും പരിഗണിച്ചാണ് മാർക്കിടുന്നത്. ഓരോ അപേക്ഷകർക്കും ലഭിച്ച മാർക്കിന്റെ വിവരങ്ങൾ 20ന്​ താലൂക്ക് സപ്ലൈ ഓഫിസുകളിൽനിന്ന് ജില്ല സപ്ലൈ ഓഫിസിലേക്ക്​ കൈമാറും. പരിശോധനകൾക്കുശേഷം 25ന്​ ജില്ല സപ്ലൈ ഓഫിസിൽനിന്ന് പൊതുവിതരണ വകുപ്പ് സംസ്ഥാന ഓഫിസിന്​ കൈമാറും. അവിടെനിന്ന് ഈ മാസം അവസാനത്തോടെ മുൻഗണന റേഷൻ കാർഡ് നൽകേണ്ടവരുടെ ജില്ലതല റാങ്ക്​പട്ടിക പ്രസിദ്ധീകരിക്കും. ജില്ലയിലെ വിവിധ താലൂക്കുകളിൽ സെപ്റ്റംബറിനുശേഷം 1,000 മുതൽ 5,000 വരെ അപേക്ഷകൾ ലഭിച്ചു. മാർച്ച് ആദ്യവാരംവരെ ലഭിച്ച അപേക്ഷകൾ മാർക്കിടുന്നതിനായി പരിഗണിക്കുന്നുണ്ട്. മാർക്കിന്‍റെ അടിസ്ഥാനത്തിൽ അർഹരായവർക്ക്​ അടിയന്തരമായി കാർഡുകൾ ലഭ്യമാക്കുന്നതിനാണ്​ തീരുമാനം. മദ്യശാല നിർത്തലാക്കൽ അധികാരം തദ്ദേശസ്ഥാപനങ്ങൾക്ക്​ വേണം -മദ്യവിരുദ്ധ സമിതി പുന്നപ്ര: നിലവിലുള്ള മദ്യനയം കൂടുതൽ ഉദാരമാക്കാനുള്ള നീക്കത്തിൽനിന്ന് പിന്തിരിയണമെന്നും ഇപ്പോഴുള്ള നയം കൂടുതൽ കർശനമാക്കണമെന്നും കേരള പ്രദേശ് മദ്യവിരുദ്ധ സമിതി സംസ്ഥാന പ്രസിഡന്റ് ബേബി പാറക്കാടൻ. സർക്കാർ മദ്യനയം തിരുത്താൻ തയാറാക്കിയ മാനദണ്ഡങ്ങൾ ചർച്ച ചെയ്യാനും അഭിപ്രായം രൂപവത്​കരിക്കാനും കേന്ദ്രസമിതി യോഗം ഉദ്ഘാടനം ചെയ്യുകയായിരുന്നു അദ്ദേഹം. മദ്യവർജനം നടപ്പാക്കുമെന്ന് പറഞ്ഞ് അധികാരത്തിൽ വന്ന സർക്കാർതന്നെ മദ്യത്തിന്റെ ഉപഭോഗവും ഉപയോഗവും വർധിപ്പിക്കുന്ന സമീപനമാണ് സ്വീകരിച്ചത്. മദ്യശാലകളുടെ എണ്ണം കൂട്ടുകയും മദ്യശാല പ്രവർത്തനസമയം വർധിപ്പിക്കാൻ ഉതകുന്ന നടപടികൾ സ്വീകരിക്കുകയും ചെയ്തു. മദ്യശാലകൾ നിർത്തലാക്കുന്നതിന്​ തദ്ദേശ സ്വയംഭരണ സ്ഥാപനങ്ങൾക്ക് ഉണ്ടായിരുന്ന അധികാരം പുനഃസ്ഥാപിക്കണമെന്ന്​ യോഗം ആവശ്യപ്പെട്ടു. ജനങ്ങളുടെ ആരോഗ്യത്തെ നശിപ്പിക്കുകയും കുറ്റവാളികളെ സൃഷ്ടിക്കുകയും ചെയ്യുന്ന മദ്യപാനത്തെ സർക്കാർതന്നെ അങ്ങേയറ്റം പ്രോത്സാഹിപ്പിക്കുന്നത്​ നിയമവിരുദ്ധവും ജനവിരുദ്ധവുമാണന്ന് യോഗം വിലയിരുത്തി. ഹക്കീം മുഹമ്മദ് രാജാ അധ്യക്ഷത വഹിച്ചു. കെ. കാർത്തികേയൻ, മൗലാനാ മുഹമ്മദ് ബഷീർ, അഡ്വ. ദിലീപ് ചെറിയനാട്, ഷീല ജഗധരൻ, ആന്റണി കരിപ്പാശേരി, ജേക്കബ് എട്ടുപറയിൽ, ഇ. ഷാബ്​ദീൻ, ബിനു മദനൻ എന്നിവർ സംസാരിച്ചു.