വിശപ്പുരഹിത​​ ഗ്രാമത്തിന്​ കരുത്തേകാൻ 10 സെന്‍റ്​ വിട്ടുനൽകി ഗ്രിഗറി

ആലപ്പുഴ: വിശപ്പുരഹിത നാട് സൃഷ്ടിക്കാൻ മുന്നേനടന്ന പാതിരപ്പള്ളിയിലെ സ്​നേഹജാലകത്തിന്​ കരുത്തുപകരാൻ 25 ലക്ഷത്തിലേറെ വിലയുള്ള ഭൂമി എഴുതി നൽകി ആലപ്പുഴ ചെട്ടികാട് കൊച്ചീക്കാരൻ വീട്ടിൽ കെ.ടി. ഗ്രിഗറിയെന്ന 78കാരൻ. കുടുംബസ്വത്തിൽനിന്ന്​ 10 സെന്‍റ്​ വിശപ്പുരഹിത കേരളം പദ്ധതിയുടെ തുടക്കക്കാരായ സി.ജി. ഫ്രാൻസീസ് സ്മാരക ട്രസ്റ്റ് സ്നേഹജാലകം പ്രവർത്തനങ്ങൾക്ക് എഴുതിനൽകിയത്​. 2017 ജനുവരി 29ന് നടന്ന സ്നേഹജാലകം പ്രതിനിധി സമ്മേളനത്തിൽ ഉദ്ഘാടകനായെത്തിയ ഡോ. ടി.എം. തോമസ് ഐസക്കാണ് വിശപ്പില്ലാത്തൊരു നാട് സൃഷ്ടിക്കാൻ കഴിയുമോ എന്ന ചോദ്യം ഉന്നയിച്ചത്​. ​ഇതിന്​ ഉത്തരമേകിയാണ്​ വിശപ്പുരഹിത സ്നേഹഗ്രാമം പദ്ധതിക്ക് തുടക്കമിട്ടത്​. ആവശ്യക്കാരുടെ എണ്ണം പെരുകിയതോടെ പാതിരപ്പള്ളി ദേശീയപാതയോരത്ത് കാഷ്യറും പണപ്പെട്ടിയുമില്ലാതെ ആരംഭിച്ച 'ജനകീയ ഭക്ഷണശാല' വേറിട്ടതായിരുന്നു. ഈ സംരംഭത്തിന്​ പിന്നാലെയാണ്​ ജനകീയ ഹോട്ടൽവഴി 20 രൂപക്ക്​ ഭക്ഷണം നൽകുന്ന പദ്ധതി സർക്കാർ ആവിഷ്കരിച്ചത്​. ദേശീയപാത വികസനത്തിന്‍റെ ഭാഗമായി ജനകീയ ഭക്ഷണശാല പ്രവർത്തിക്കുന്ന കെട്ടിടം പൊളിക്കുന്ന സാഹചര്യം തിരിച്ചറിഞ്ഞാണ്​ തുടക്കം മുതൽ സ്​നേഹജാലകം പ്രവർത്തകൻകൂടിയായ ഗ്രിഗറി സ്ഥലം വിട്ടുനൽകിയത്​. വിശപ്പുരഹിത ഗ്രാമം പദ്ധതിക്ക്​ അഞ്ചുവർഷം പൂർത്തിയായതിന്‍റെ ഭാഗമായി ഒരുക്കിയ ചടങ്ങിൽ മുൻമന്ത്രി ജി. സുധാകരൻ, കെ.ടി. ഗ്രിഗറിയിൽനിന്ന്​ ഭൂമിയുടെ രേഖകൾ ഏറ്റുവാങ്ങി. പി.പി. ചിത്തരഞ്ജൻ എം.എൽ.എ, സ്​നേഹജാലകം പ്രസിഡൻറ്​ എൻ.പി. സ്​നേഹജൻ, ജയൻ തോമസ്, ആർ. പ്രവീൺ, സജിത്ത് രാജ്, പി.എം. ഷാജി, കുഞ്ഞുമോൾ ഷാജി, പ്രകാശ് ബാബു, ജോൺ പോൾ, സി.പി. സീസർ എന്നിവരും ഒപ്പമുണ്ടായിരുന്നു. APL gigary ഗ്രിഗറി APL G sudakaran വിശപ്പുരഹിത ഗ്രാമം പദ്ധതിയുടെ നടത്തിപ്പിന്​ സ്​നേഹജാലകത്തിന്​ വിട്ടുനൽകിയ സ്ഥലത്തിന്‍റെ രേഖകൾ. സി.ജി. ഫ്രാൻസീസ് സ്മാരക ട്രസ്റ്റ് സ്നേഹജാലകം പ്രവർത്തനങ്ങൾക്ക് എഴുതിനൽകിയത്​