സ്വകാര്യ ബസുകൾ പാതിവഴിയിൽ ട്രിപ് അവസാനിപ്പിക്കുന്നു

തുറവൂർ: ചേർത്തല-എറണാകുളം, അരൂർ ക്ഷേത്രം-ചേർത്തല റൂട്ടിൽ സർവിസ്​ നടത്തുന്ന സ്വകാര്യ ബസുകൾ പാതി വഴിയിൽ ട്രിപ്​ അവസാനിപ്പിക്കുന്നതായി പരാതി. വൈകീട്ട് ഏഴിന്​ ശേഷം സ്വകാര്യ ബസുകൾ ഒന്നും തുറവൂരിൽ നിർത്തി യാത്രക്കാരെ കയറ്റാറില്ല. ബസുകൾ പൊന്നാംവെളി, പട്ടണക്കാട്, വയലാർ കവല തുടങ്ങിയ സ്ഥലങ്ങളിൽ സ്റ്റേ ചെയ്യുകയാണ് പതിവ്. ചില ബസുകൾ പട്ടണക്കാട് ശിവക്ഷേത്രത്തിന് മുന്നിൽ യൂടേൺ തിരിഞ്ഞ് നിർത്തിയ ശേഷം യാത്രക്കാരെ ഇറക്കിവിടുന്നതായി പരാതിയുണ്ട്​. തൊട്ടടുത്ത് ബസ് സ്റ്റോപ്പില്ലാത്തതിനാൽ സന്ധ്യ കഴിഞ്ഞെത്തുന്ന യാത്രക്കാരായ സ്ത്രീകളും കുട്ടികളുമാണ് ഏറെ ബുദ്ധിമുട്ടുന്നത്. പട്ടണക്കാട് സർക്കാർ സ്കൂളിന് മുന്നിൽ എത്തിയാലേ കെ.എസ്.ആർ.ടി.സി ബസുകൾ കിട്ടൂ. ചേർത്തല -അരൂക്കുറ്റി റൂട്ടിലോടുന്ന സ്വകാര്യ ബസുകളെക്കുറിച്ചും പരാതിയുണ്ട്​. കെ.എസ്.ആർ.ടി.സി സർവിസ് നടത്താത്ത ഈ റൂട്ടിൽ സ്വകാര്യ ബസുകളാണ് ആശ്രയം. ഇവിടെയും ബസുകൾ വൈകീട്ടോടെ പാതി വഴിയിൽ ട്രിപ്​ അവസാനിപ്പിക്കുകയാണ്​. അരൂർ ക്ഷേത്രം- ചേർത്തലയാണ് പെർമിറ്റെങ്കിലും വൈകുന്നേരമായാൽ ബസുകൾ തവണക്കടവിൽ ട്രിപ്​ അവസാനിപ്പിക്കുകയാണ്. ഇവിടെ നിന്ന്​ ചേർത്തലക്ക്​ പോകണമെങ്കിൽ മറ്റ് വാഹനങ്ങളെ ആശ്രയിച്ചേ പറ്റൂ. ഗുണ്ട മാഫിയയെപ്പോലെയാണ് ജീവനക്കാർ യാത്രക്കാരോട് പെരുമാറുന്നതെന്ന ആക്ഷേപവും ഉണ്ട്​. വിദ്യാർഥികളോടും മറ്റും വളരെ മോശമായി പെരുമാറുന്ന ബസ്​ ജീവനക്കാർ എണ്ണത്തിൽ വളരെ കൂടുതലാണെന്നും യാത്രക്കാർ ചൂണ്ടിക്കാട്ടുന്നു. എന്നാൽ, പൊലീസോ മോട്ടോർ വാഹന വകുപ്പ്​ അധികൃതരോ പരാതി ശ്രദ്ധിക്കുന്നില്ല. വൈകീട്ട്​ കലൂരിൽനിന്ന്​ തുറവൂർ വരെയാണ് പെർമിറ്റെന്നും ചേർത്തലക്ക്​ പോകില്ലെന്നുമാണ്​ ജീവനക്കാർ പറയുന്നത്. ഏഴ് മണിക്ക് ശേഷം തുറവൂരിൽനിന്ന്​ ചേർത്തല, ആലപ്പുഴ മേഖലയിലേക്ക്​ യാത്ര ചെയ്യണമെങ്കിൽ കെ.എസ്.ആർ.ടി.സി മാത്രമാണ്​ ജനങ്ങൾക്കാശ്രയം. സോളിഡാരിറ്റി കാരവൻ ഇന്ന് ആലപ്പുഴയിൽ ആലപ്പുഴ: ഇസ്​ലാമോഫോബിയ കുറ്റകൃത്യമായി പ്രഖ്യാപിക്കുക എന്ന പ്രമേയത്തിൽ സോളിഡാരിറ്റി സംസ്ഥാന പ്രസിഡന്‍റ് നഹാസ് മാള നയിക്കുന്ന യൂത്ത് കാരവൻ ബുധനാഴ്ച ജില്ലയിൽ പര്യടനം നടത്തും. ഉച്ചക്ക് രണ്ടിന്​ ആലപ്പുഴ സക്കറിയ ബസാറിൽനിന്ന് ബൈക്ക് റാലിയുടെ അകമ്പടിയോടെ സ്വീകരണ പരിപാടി ആരംഭിക്കും. വൈകീട്ട്​ 3.30ന് വളഞ്ഞവഴിയിൽ നടക്കുന്ന പൊതുസമ്മേളനം സംസ്ഥാന സെക്രട്ടറി പി.പി. ജുമൈൽ ഉദ്​ഘാടനം ചെയ്യും. 21, 22 തീയതികളിൽ എറണാകുളത്ത് നടക്കുന്ന സംസ്ഥാന സമ്മേളനത്തിന് മുന്നോടിയായി നടക്കുന്ന കാരവൻ 12ന് തിരുവനന്തപുരത്ത് സമാപിക്കും.