വൃക്കകൾ തകരാറിലായ സന്‍ജിന്റെ ജീവനായി കൈകോര്‍ക്കുന്നു

ചേര്‍ത്തല: വൃക്കകൾ തകരാറിലായ സന്‍ജിനെ രക്ഷിക്കാൻ നാട്​ കൈകോര്‍ക്കുന്നു. അടിയന്തരമായി വൃക്ക മാറ്റിവെക്കല്‍ ശസ്ത്രക്രിയ നിർദേശിച്ച 16കാരനെ രക്ഷിക്കാനാണ് നാടൊന്നിക്കുന്നത്. നഗരസഭ 11ാം വാര്‍ഡില്‍ സജി, ഷീബ ദമ്പതികളുടെ ഏക മകനും കണിച്ചുകുളങ്ങര വി.എച്ച്.എസ്.ഇയിലെ പ്ലസ് വണ്‍ വിദ്യാര്‍ഥിയുമാണ്​. അമ്മ ഷീബ വൃക്കനല്‍കാന്‍ സന്നദ്ധയായി. ശസ്ത്രക്രിയയും തുടര്‍ചികിത്സയുമടക്കമുള്ള ചെലവുകൾ നിർധന കുടുംബത്തിന്​ താങ്ങാവുന്നതിലും അപ്പുറമായതോടെയാണ് നഗരസഭ നേതൃത്വത്തില്‍ ചികിത്സക്ക്​ കൈകോര്‍ക്കുന്നത്. ചങ്ങനാശ്ശേരി പ്രത്യാശ സഹകരണത്തില്‍ ജീവന്‍ രക്ഷാസമിതിക്ക്​ രൂപം നല്‍കിയാണ് പ്രവര്‍ത്തനം. ഈ മാസം എട്ടിന്​ രാവിലെ എട്ടുമുതല്‍ ഒന്നുവരെ 35 വാര്‍ഡില്‍നിന്നായി 50 ലക്ഷം രൂപ സമാഹരിക്കുകയാണ്​ ലക്ഷ്യം. ഇതിനായി നഗരസഭതലത്തിലും വാര്‍ഡുതലത്തിലും ജനകീയ സമിതികള്‍ രൂപവത്​കരിച്ചു. 156 സ്ക്വാഡാണ് സമാഹരണത്തിനിറങ്ങുന്നത്. എല്ലാ വീടുകളിലും ഇതിനുള്ള സന്ദേശങ്ങള്‍ എത്തിച്ചതായി ചെയര്‍പേഴ്‌സൻ ഷേര്‍ളി ഭാര്‍ഗവന്‍, ജനറല്‍ കണ്‍വീനര്‍ എന്‍.കെ. പ്രകാശന്‍, പി. ഉണ്ണികൃഷ്ണന്‍, ആശ മുകേഷ്, സ്ഥിരം സമിതി ചെയര്‍മാന്‍മാരായ എ.എസ്. സാബു, ജി. രഞ്ജിത്ത് എന്നിവര്‍ വാർത്തസമ്മേളനത്തില്‍ അറിയിച്ചു.