മോഷണംപോയ സ്കൂട്ടർ റാന്നിയിൽ കണ്ടെത്തി

ചെങ്ങന്നൂർ: വെൺമണിയിൽനിന്ന്​ മോഷണം പോയ സ്കൂട്ടർ റാന്നിയിൽ ഉപേക്ഷിക്കപ്പെട്ട നിലയിൽ കണ്ടെത്തി. വെൺമണി പുന്തല താഴം നന്ദനത്തിൽ അജിത് കുമാറിന്‍റെ ഉടമസ്ഥതയിലുള്ള പ്ലഷർ സ്കൂട്ടറാണ്​ കണ്ടെത്തിയത്​. കഴിഞ്ഞ 20ന് വൈകീട്ട്​ വെൺമണി കുളനട റോഡരികിലെ വീട്ടുമുറ്റത്ത് നിന്നാണ്​ സ്കൂട്ടർ മോഷണം പോയത്. അജിത്തിന്‍റെ ഭാര്യ സ്കൂട്ടറിൽ പാൽ വാങ്ങാൻ പോയശേഷം ഭർത്താവിന്‍റെ ഉപയോഗത്തിനായി സ്​കൂട്ടറിൽനിന്ന്​ താക്കോൽ എടുത്തിരുന്നില്ല. ഈ തക്കത്തിനാണ് മോഷ്ടാവ് സ്കൂട്ടറുമായി കടന്നത്. വെൺമണി പൊലീസ്​ കേസെടുത്ത്​ അന്വേഷണം നടത്തുന്നതിനിടെയാണ്​ റാന്നി മാർത്തോമ പള്ളിക്ക്​ സമീപം റോഡരികിൽ ഉപേക്ഷിക്കപ്പെട്ട നിലയിൽ സ്കൂട്ടർ കണ്ടെത്തിയത്​.