റമദാന്​ വിട​ചൊല്ലി അവസാന വെള്ളി; കണ്ണീരണിഞ്ഞ്​ വിശ്വാസികൾ

ആലപ്പുഴ: റമദാന്​ യാത്രാമൊഴിയേകാൻ പള്ളികളിൽ ഒത്തുചേർന്ന വിശ്വാസികൾ അവസാന വെള്ളിയാഴ്ച പ്രാർഥനനിര്‍ഭരമാക്കി. രണ്ടുവർഷമായി കോവിഡ്​ വ്യാപനത്തിൽ അടഞ്ഞുകിടന്ന പള്ളികളിൽ റമദാനിലെ ഒത്തുചേരലുകൾ നടന്നിരുന്നില്ല. നിയന്ത്രണം പൂർണമായും മാറിയതോടെ എത്തിയ ആദ്യ റമദാനിലെ അവസാന വെള്ളിയാഴ്ചത്തെ ജുമുഅ നമസ്‌കാരത്തിനും പ്രാർഥനകൾക്കും​ വിശ്വാസികൾ കൂട്ടത്തോടെയാണ്​ പള്ളികളിലേക്ക്​ ഒഴുകിയെത്തിയത്​. പുണ്യകര്‍മങ്ങള്‍ക്ക് ആയിരം മാസത്തേക്കാള്‍ പ്രതിഫലം ലഭിക്കുന്ന ലൈലത്തുല്‍ ഖദ്‌റിന്‍റെ (വിധി നിർണയരാവ്​) പുണ്യംനുകരാനും 27ാം രാവിൽ (വ്യാഴാഴ്ച) രാത്രി ഉറ​ക്കമൊഴിച്ച്​ പ്രാർഥനകളിൽ വ്യാപൃതരാകാനും വിശ്വാസികൾ നേരത്തെ പള്ളികളിൽ ഇടംപിടിച്ചു. ജുമുഅക്ക്​ വൈകിയെത്തിയവരെ ഉള്‍ക്കൊള്ളാനാകാതെ പല പള്ളികളിലും പുറത്ത് സൗകര്യമൊരുക്കിയിരുന്നു. ലൈലത്തുല്‍ഖദ്‌ർ രാവിന്​ പിന്നാലെ വെള്ളിയാഴ്ചത്തെ ജുമുഅയും ഒരുമിച്ചെത്തിയതോടെ​​ പള്ളികളിൽ വൻ തിരക്കാണ്​​ അനുഭവപ്പെട്ടത്​. വ്രതാനുഷ്ഠാനം വിടവാങ്ങുന്നതിന്​ മുന്നോടിയായി വിശ്വാസികള്‍ കൂട്ടത്തോടെ സംഗമിക്കുന്ന ജുമുഅ നമസ്കാരത്തിന്​ മുന്നോടിയായുള്ള ഖുതുബയിൽ (പ്രഭാഷണം) മിമ്പറുകളിൽനിന്ന്​ ഇമാമുകൾ 'അസ്സലാമു അലൈക്ക യാശഹ്​റു റമദാൻ... എന്നുപറഞ്ഞ്​ റമദാനെ വിടചൊല്ലിയപ്പോൾ വിശ്വാസികൾ കണ്ണീരണിഞ്ഞാണ്​ പ്രാർഥനയിൽ പങ്കുചേർന്നത്​. റമദാനിലെ നമസ്കാരവും നോമ്പും ഖുർആൻ പാരായണവും ഇഅ്​തികാഫും നേടിത്തന്ന വിശുദ്ധി വരുംനാളുകളിൽ കാത്തുസൂക്ഷിക്കണമെന്നാണ്​​​ പ്രധാനമായും ഇമാമുകൾ പ്രസംഗിച്ചത്​. റമദാൻ വിടചൊല്ലുന്നതിന്‍റെ വേദനക്കൊപ്പം നോമ്പിന്‍റെ ശുദ്ധീകരണത്തിനായി​ അല്ലാഹു നിർബന്ധമാക്കിയ ഫിത്​ർ സകാത്തിനെക്കുറിച്ചും ഖുതുബയിൽ വിശദീകരിച്ചു. വിശ്വാസപരമായി പൂർത്തിയാക്കേണ്ട നോമ്പിന്‍റെ കർമങ്ങൾ നിറവേറ്റാൻ ആദ്യത്തെ പത്ത് (കാരുണ്യം), രണ്ടാമത്തെ പത്ത് (പാപമോചനം), മൂന്നാമത്തെ പത്ത് (നരകമോചനം) എന്നിങ്ങനെ വേർതിരിച്ചിട്ടുണ്ട്​​. തറാവീഹ്​ നമസ്കാരത്തിനും പള്ളികളിൽ വൻ തിരക്കായിരുന്നു. രണ്ടുനാളത്തെ നോമ്പിനുശേഷം മാസപ്പിറവി ദൃശ്യമായാല്‍ തിങ്കളാഴ്ച ഈദുല്‍ഫിത്​ര്‍ (ചെറിയ പെരുന്നാൾ) ആഘോഷിക്കും. അല്ലെങ്കിൽ ചൊവ്വാഴ്ചയാവും പെരുന്നാൾ. വീടുകളിലും പള്ളികളിലും പെരുന്നാള്‍ ആഘോഷത്തിനുള്ള തയാറെടുപ്പുകൾ ആരംഭിച്ചു. APL MB01 masthan pally റമദാനിലെ അവസാന വെള്ളിയാഴ്ച ആലപ്പുഴ മസ്​താൻ പള്ളി കിഴക്കേ മുസ്​ലിം ജമാഅത്തിൽ നടന്ന ജുമുഅ നമസ്കാരം