സ്കൂൾ കെട്ടിടത്തിന്റെ ഉദ്ഘാടനത്തിന്​ ആളെക്കൂട്ടാൻ കുടുംബശ്രീ അംഗങ്ങൾക്ക് സന്ദേശം

അരൂർ: സ്കൂൾ കെട്ടിടത്തിന്റെ ഉദ്ഘാടന പരിപാടിക്ക് ആളെക്കൂട്ടാൻ കുടുംബശ്രീ അംഗങ്ങൾക്ക് അയച്ച വാട്സ്ആപ് സന്ദേശം വിവാദമായി. അരൂർ ഗവ. ഹൈസ്കൂളിലെ പുതുതായി പണിത കെട്ടിടം ഉദ്ഘാടനം ചൊവ്വാഴ്ച രണ്ടിന്​ വിദ്യാഭ്യാസ മന്ത്രി ശിവൻകുട്ടി നിർവഹിക്കുകയാണെന്നും ഓരോ വാർഡിൽനിന്ന്​ 10 പേരെ വീതം പങ്കെടുപ്പിക്കണം, 5, 6, 7 വാർഡുകളിൽനിന്ന്​ പരമാവധി കുടുംബശ്രീ അംഗങ്ങളെ പങ്കെടുപ്പിക്കണം എന്നായിരുന്നു സന്ദേശം. ഇങ്ങനെ ഒരു വാട്സ്ആപ് സന്ദേശം തിങ്കളാഴ്ച വൈകീട്ടു മുതൽ അരൂർ ഗ്രാമപഞ്ചായത്തിലെ 22 വാർഡുകളിലെ കുടുംബശ്രീ പ്രവർത്തകർക്ക് ലഭിച്ചിരുന്നു. സി.പി.എം നേതാക്കളുടെ നിർദേശപ്രകാരം സി.ഡി.എസ് ഭാരവാഹികളാണ് സന്ദേശം അയച്ചതെന്ന് പറയുന്നു.