കൃഷിനാശം:​​ മാ​ർഗനിർദേശവുമായി മ​ങ്കൊമ്പ്​ നെല്ലുഗവേഷണ കേന്ദ്രം

-നെല്ലിന്​ പുറമെ ​തെങ്ങ്​, കുരുമുളക്​ പരിപാലനവും ആലപ്പുഴ: വേനൽമഴയിൽ കൃഷിനാശം വ്യാപകമായ സാഹചര്യത്തിൽ കർഷകർക്ക് വഴികാട്ടിയും ജാഗ്രത നിർദേശങ്ങൾ പുറപ്പെടുവിച്ചും മങ്കൊമ്പ് നെല്ലുഗവേഷണ കേന്ദ്രം. നെല്ലിനുപുറമെ ​തെങ്ങ്​, കുരുമുളക്​ അതിജീവനം കൂടി മുന്നിൽക്കണ്ടുള്ള നിർദേശങ്ങളാണ്​ ഗവേഷണകേന്ദ്രം മുന്നോട്ടുവെക്കുന്നത്​. വെള്ളക്കെട്ടുള്ള പാടങ്ങളിൽ മൂന്നു നാലുമീറ്റർ അകലത്തിൽ നെൽച്ചെടികൾ വകഞ്ഞ്​ ചാലെടുത്ത്​ വെള്ളം വാർന്നുപോകാൻ അനുവദിക്കണം. നെല്ല്​ മൂടിയിടുമ്പോൾ മണ്ണിൽനിന്ന്​ ജലാംശം ആഗിരണം ചെയ്യപ്പെടുന്നത്​ തടയാൻ ഉണങ്ങിയ വൈക്കോൽ നിരത്തി അതിനുമുകളിൽ പടുത വിരിച്ച്​ നെല്ല്​ കൂട്ടിയിടണം. പകൽ സമയത്ത് മൂടപൊട്ടിച്ച് നെല്ല്‌ കാറ്റും വെയിലും കൊള്ളാൻ അനുവദിക്കണം. ബാക്ടീരിയൽ ഇല കരിച്ചിൽ രോഗമുണ്ടായിരുന്ന പാടങ്ങളിൽ കൊയ്ത്തിനുശേഷം വൈക്കോൽ നീക്കണം. വരിനെല്ലിന്‍റെ ആക്രമണം ഉണ്ടായിരുന്ന പാടശേഖരങ്ങളിൽ കൊയ്ത്തുകഴിഞ്ഞ്​ വെള്ളം കയറ്റി 15-20 ദിവസം കള കിളിർപ്പിക്കുക. ഒരു ചാൽ ഉഴുതിട്ടശേഷം വെള്ളം കയറ്റിയിടുന്നത് കള, വൈക്കോൽക്കുറ്റികൾ എന്നിവ അഴുകിച്ചേരാനും കീടബാധ തടയാനും സഹായകമാണ്. തെങ്ങിന്​ കൂമ്പുചീയൽ രൂക്ഷമാകുന്ന സാഹചര്യത്തിൽ രോഗം ബാധിച്ച ഭാഗങ്ങൾ ചെത്തിമാറ്റി ബോർഡോ പേസ്റ്റ് പുരട്ടിക്കൊടുക്കാം. തുടർന്ന്,​ ബോർഡോ മിശ്രിതം തളിക്കണം. കൊമ്പൻ ചെല്ലിയുടെയും ചെമ്പൻ ചെല്ലിയുടെയും ആക്രമണം ഉണ്ടാകാതിരിക്കാൻ കൂമ്പിന്​ താഴെയുള്ള രണ്ടുമൂന്ന് ഓലക്കവിളുകളിൽ പാറ്റാ ഗുളിക രണ്ടെണ്ണം വീതംവെച്ച് മണൽ കൊണ്ടുമൂടുക. അല്ലെങ്കിൽ 250 ഗ്രാം വേപ്പിൻപിണ്ണാക്കും അത്രയുംതന്നെ മണലും ചേർന്ന മിശ്രിതം ഓലക്കവിളുകളിൽ നിറക്കാം. കൊമ്പൻചെല്ലി പെരുകുന്നത്​ തടയാൻ മെറ്റാറൈസിയം എന്ന കുമിൾ ചാണകത്തിൽ ഒരു കിലോ എന്ന തോതിൽ ഇടുക. മെറ്റാറൈസിയം കുമിൾ ഓണാട്ടുകര പ്രാദേശിക കാർഷിക ഗവേഷണകേന്ദ്രത്തിൽ ലഭിക്കും. കുരുമുളക് ഒരുവള്ളിക്ക് അരക്കിലോ കുമ്മായം എന്ന തോതിൽ ചേർക്കുക. രണ്ടാഴ്ചക്കുശേഷം വള്ളിക്ക്​ 10 കിലോ ചാണകം എന്ന തോതിൽ ചേർക്കുക. രോഗംബാധിച്ച ഭാഗത്ത് ഒരു ശതമാനം ബോർഡോ മിശ്രിതം തളിക്കണം. കോപ്പർ ഓക്‌സിക്ലോറൈഡ് മൂന്നുഗ്രാം ഒരു ലിറ്റർ വെള്ളത്തിൽ കലക്കി ചുറ്റും ഒഴിച്ചുകൊടുക്കണം. നെല്ലുഗവേഷണകേന്ദ്രം ഹെൽപ് ഡെസ്ക് നമ്പർ: വിളപരിപാലനം- 9495671971. മണ്ണ്​ പരിശോധന -9847375249. രോഗ നിയന്ത്രണം -9447565946. കീട നിയന്ത്രണം -9526548485. വിള, വിത്തുൽപാദനം -9495424961. കാലാവസ്ഥ -9496156764.