വിഷു​ക്കൈനീട്ടമെന്ന പേരിൽ ബി.ജെ.പി ചെങ്ങന്നൂരിൽ പണം വിതരണം നടത്തിയെന്ന് സി.പി.എം

ചെങ്ങന്നൂർ: തൃശൂർ മോഡൽ വിഷു​ക്കൈനീട്ടം ബി.ജെ.പി ചെങ്ങന്നൂരിലും നടപ്പാക്കുകയാണെന്ന് സി.പി.എം ചെങ്ങന്നൂർ ഏരിയ കമ്മിറ്റി ആരോപിച്ചു. വിഷുദിനത്തിൽ ചെങ്ങന്നൂരിലെ വിവിധ ക്ഷേത്രങ്ങൾ കേന്ദ്രീകരിച്ച് ബി.ജെ.പി പ്രവർത്തകർ കൈനീട്ടമെന്ന പേരിൽ പണം വിതരണം നടത്തി. ചെങ്ങന്നൂർ മഹാദേവക്ഷേത്രത്തിന്​ മുന്നിൽ ബി.ജെ.പി ജില്ല പ്രസിഡന്‍റ്​ എം. വി. ഗോപകുമാറിന്‍റെ നേതൃത്വത്തിലായിരുന്നു വിതരണം. ഇതു വരെ കാട്ടാത്ത ശുഷ്കാന്തിയോടെ വിഷുദിനത്തിൽ ഇവർ നടത്തിയ സാമ്പത്തിക വിതരണം തെരഞ്ഞെടുപ്പ് ലക്ഷ്യമിട്ടുള്ള തിരക്കഥയുടെ ഭാഗമാണ്. വിശ്വാസികളെ സ്വാധീനിക്കാനുള്ള ശ്രമമാണ് ഇതിനുപിന്നിൽ. ക്ഷേത്രങ്ങളെ രാഷ്ട്രീയകാര്യങ്ങൾക്ക് ഉപയോഗിക്കുന്ന സംഘ്​പരിവാറിന്‍റെ നയമാണ് ഇവിടെ ആവർത്തിക്കുന്നത്. ചെങ്ങന്നൂർ ഉപതെരഞ്ഞെടുപ്പു മുതൽ ഇത്തരത്തിലുള്ള സാമ്പത്തിക വിതരണം വ്യാപകമായി നടപ്പാക്കുന്നു. ബി.ജെ.പി ജില്ല പ്രസിഡന്‍റിന്‍റെ നേതൃത്വത്തിൽ ഇത്തരത്തിൽ കണക്കില്ലാത്ത ചെലവഴിക്കുന്ന പണത്തിന്‍റെ ഉറവിടം അന്വേഷിക്കണമെന്ന് സി.പി.എം ചെങ്ങന്നൂർ ഏരിയ സെക്രട്ടറി എം. ശശികുമാർ ആവശ്യപ്പെട്ടു.